’ఆత్మహత్య‘లను నివారించే మరో కొత్త మొబైల్ ‘యాప్’!

Posted: 02/18/2015 01:20 PM IST

Suicide prevention app america broome county national suicide prevention lifeline

ఇటీవలేకాలంలో ఆత్మహత్య చేసుకునేవారి సంఖ్య ఇబ్బడిముబ్బడిగా పెరిగిపోతోంది. ఈ విషయంపై ఆమధ్య ఓ సంస్థ నిర్వహించిన సర్వేలో భాగంగా గతంతో పోల్చుకుంటే ఇప్పుడు సూసైడ్ శాతం భారీగా పెరిగిపోయిందని తేల్చి చెప్పింది. ఇందులో చాలావరకు గృహిణులు, విద్యార్థులే వున్నారని పేర్కొంది కూడా! తీవ్ర మానసిన ఆవేదనకు గురవుతున్నవాళ్లే తమనుతాము హతమార్చుకుంటున్నట్లు తెలిసింది! అందుకేనేమో.. ఈ ఆత్మహత్యలను నివారించేందుకు కొందరు నిపుణులు సరికొత్త ‘యాప్’ను ఆవిష్కరించారు.

ఇప్పటికే ఆవిష్కరించబడ్డ లెక్కలేనన్ని మొబైల్ అప్లికేషన్ల ప్రపంచంలోకి మరో కొత్త యాప్ రంగప్రవేశం చేసింది. దాని పేరు ‘హోప్’. ఇది ఆత్మహత్యలను నివారించడానికి ఉపయోగపడుతుందని రూపకర్తలు అంటున్నారు. ఓ చెక్ లిస్టు సాయంతో వ్యక్తుల మానసిక స్థితిని అంచనావేయడం ద్వారా వారిలో మెదులుతున్న ఆత్మహత్య సూచనలను ఈ యాప్ పసిగడుతుందని నిపుణులు స్పష్టం చేస్తున్నారు. డిప్రెషన్ లో వున్నవారిని గుర్తించి, వెంటనే వారిని నేషనల్ సూసైడ్ ప్రివెన్షన్ లైఫ్ లైన్ కి అనుసంధానిస్తుంది. ఫలితంగా ఆయా వ్యక్తులకు సరైన సమయంలో కౌన్సెలింగ్ లభిస్తుందని చెబుతున్నారు.

ఈ సరికొత్త యాప్ ని అమెరికాలోని బ్రూమ్ కౌంటీ ప్రవేశపెట్టింది. ఆండ్రాయిడ్, ఐఫోన్లలో దీనిని ఉచితంగానే డౌన్ లోడ్ చేసుకోవచ్చు. ఈ యాప్ సమాచారం మొత్తం నేషనల్ సూసైడ్ ప్రివెన్షన్ లైఫ్ లైన్ అధీనంలో వుంటుంది. ఈ యాప్ అందించే ప్రతిసమాచారాన్ని ‘లైఫ్ లైన్’ విశ్లేషించి.. అవసరమైన వారికి కౌన్సెలింగ్ ఇస్తుంది. మరి.. ఈ యాప్ ద్వారా ఎంతమంది ఆత్మహత్య చేసుకోకుండా బయటపడతారో వేచి చూడాల్సిందే!