నీనోట్లో పడితే కేసీఆరైనా, కేంద్రమంత్రైనా ఖతమే

Posted: 12/28/2014 11:20 AM IST

రాజకీయమంటేనే మాటల గారడి. మాటలు నేర్చిన నేతలంతా పోటి పడే ఈ ఆటలో ప్రజలను మెప్పించినవారే విజేతలు. ప్రసంగాలు, మాటలు చెప్పటం, విమర్శలు చేయటంలో ఒక్కొక్కరిదీ ఒక్కో స్టయిల్. ఇప్పుడు మనం మాట్లాడుకునేది పొంగులేటి సుధాకర్ రెడ్డి గారి గురించి. తెలంగాణ కాంగ్రెస్ నేతగా ఉద్యమం సమయంలో హైలైట్ అయిన ఈయన.., ఎవరినైనా విమర్శించగల సత్తా ఉన్న వ్యక్తి. ఈయన తిడుతుంటే అవతలి వ్యక్తులు కూడా తమను ఎలా  తిడుతున్నాడు అని ఆసక్తిగా గమనిస్తారు. సాధారణ భాషలో, వ్యంగ్యమైన వాయిస్ తో ప్రతి ప్రతిపక్ష నేతనూ ఈయన మాటలు మర్దనా చేస్తాయి.

తాజాగా పొంగులేటి విమర్శల పొంగు కేసీఆర్, కేంద్రమంత్రి వెంకయ్యపై పడింది. కేంద్రంలో కీరోల్ ప్లే చేస్తున్న వెంకయ్య తెలుగు ప్రజలకు చెవిలో పువ్వులు బాగానే పెడుతున్నారని విమర్శించారు. తెలంగాణ బిల్లు పాసయినప్పుడు.., వెంకయ్య వల్లే ఇది సాధ్యమైందని బీజేపీ నేతలు గొప్పలు చెప్పుకున్నారు. కానీ సారు అసలు సంగతి... బాబుతో కలిసి చేసిన కుట్రలు జనాలకు తెలుసే అని ద్వజమెత్తారు. విభజన చట్టాన్ని ఉపయోగించి ఖమ్మంలో గ్రామాలను ఏపీలో కలిపిన వెంకయ్య నాడు చట్టం ప్రకారం చేసుకుపోతున్నామని చెప్పారు. మరి ఇవాళ ఏపీకి ప్రత్యేక  హోదా ఇస్తామని చట్టంలో పేర్కొంటే అదంతా నోటి మాట.., గాలి బాసట అని చెవిలో పువ్వులు పెడుతున్నారు అని విమర్శించారు. తనదైన స్టయిల్ లో బీజపికి భారత్ జూటా పార్టీ అని కొత్త డెఫినెషన్ చెప్పారు.

ఇక అలవాటు ప్రకారం తెలంగాణ ముఖ్యమంత్రి కేసీఆర్ పై కూడా విమర్శల అక్షింతలు వేశారు. తెలంగాణ ప్రజలను గాలికొదిలేసి.., కేసీఆర్ ఏరియల్ సర్వేలు చేస్తున్నారని ద్వజమెత్తారు. విహార యాత్రలు, విహంగ వీక్షణాలు మాని.., భూ ప్రదక్షిణలు, ఢిల్లీ ప్రదక్షిణలు చేయాలని సూచించారు. తెలంగాణకు జరుగుతున్న అన్యాయం అడ్డుకోకపోతే, సీఎంకు మేలుకొలుపు యాత్ర చేస్తామని ఎద్దేవా చేశారు. ఆయన కామెంట్లు ఎలా ఉన్నాయో మీరే చూడండి.

 

 

కార్తిక్