పాక్ నుంచి వెళ్ళిపోండి- భారత జర్నలిస్ట్ లకు ఆదేశం

Posted: 05/10/2014 06:04 PM IST

భారత్ పాక్ దేశాల మధ్య ఉన్న ఒప్పందం ప్రకారం ఇరు దేశాల నుంచి ఒకరి దేశ రాజధానిలో మరొక దేశ నుంచి ఇద్దరు జర్నలిస్ట్ లను నియమించుకోవచ్చు.  ఆ విధంగా భారత్ నుంచి లభించిన పాకిస్తాన్ వీసా మీద ద హిందూ తరఫునుంచి మీనా మీనన్, పిటిఐ నుంచి స్నేహేష్ అలెక్స్ ఫిలిప్ ఆగస్ట్ 2013 లో పాకిస్తాన్ వెళ్లారు.  మూడు నెలలకోసారి వాళ్లు వీసా రెన్యువల్ కి దరఖాస్తు పెట్టుకోవలసి ఉంటుంది కాబట్టి అలాగే చేస్తూ వచ్చారు.  

మార్చి 9 న వీసా గడువు ముగిసే ముందుగానే ఆ ఇద్దరు పాత్రికేయులూ రెన్యువల్ కోసం అప్లై చేసారు.  గడువు ముగిసేంత వరకూ ఏ సమాధానమూ రాలేదు.  ఆ తర్వాత వీసా ప్రక్రియ కొనసాగుతోందంటూ సమాధానం వచ్చింది.  ఆ తర్వాత సంబంధిత మంత్రిత్వ శాఖకు లేఖ రాయగానే సమాధానమేమీ రాలేదు కానీ తాజాగా వీసా గడువ అయిపోయి రెండు నెలలైంది కాబట్టి వారం రోజులలో దేశాన్ని విడిచి పొమ్మంటూ ఆ మంత్రిత్వ శాఖనుంచి ఉత్తర్వు వచ్చింది.  

ఇద్దరు పాత్రికేయులను ఒకరి దేశానికొకరు పంపించుకునే వెసులుబాటు ఇరు దేశాల మధ్య చేసుకున్న ఒప్పందం కలిగిస్తున్నా, పాకిస్తాన్ నుంచి మాత్రం పాత్రికేయులెవరూ భారత్ కి వీసా మీద రాకపోవటం విశేషం.

-శ్రీజ