తెలంగాణాకు మహిళా ముఖ్యమంత్రి- కాంగ్రెస్ వాగ్దానం

Posted: 04/26/2014 12:17 PM IST

ముఖ్యమంత్రి పేరును ఇంతవరకు ప్రకటించని కాంగ్రెస్ పార్టీ ఉపాధ్యక్షుడు రాహుల్ గాంధీ ఎన్నికల ప్రచార సభలో వరంగల్ లో మాట్లాడుతూ, కాంగ్రెస్ పార్టీ అధికారంలోకి వస్తే తెలంగాణా రాష్ట్రానికి మహిళనే ముఖ్యమంత్రిని చేస్తామని వాగ్దానం చేసారు. 

ఇంతకు ముందు దళితుడిని ముఖ్యమంత్రిని చేస్తామని ప్రకటించటంతో అందరూ మాజీ ఉపముఖ్యమంత్రి దామోదర రాజనరసింహను ముఖ్యమంత్రిని చేస్తారని అనుకున్నారు.  ఆయనను ప్రచార కమిటీకి సారధిగా నియమించటం కూడా ఆ ఆలోచనకు ఊతానిచ్చింది.  అయితే ఇప్పుడు మహిళను ముఖ్యమంత్రిని చేస్తామని ప్రకటించటంతో రెండు యోగ్యతలూ గల మాజీ మంత్రి గీతారెడ్డికి ఆ అవకాశం లభించవచ్చని, దీనితో కాంగ్రెస్ పార్టీ దళితులకే కాకుండా మహిళలకు కూడా ప్రాధాన్యతనిచ్చిన మంచిపేరుని సంపాదిస్తుందని, రాహుల్ గాంధీ ప్రకటనను కాంగ్రెస్ పార్టీ నాయకులు సమర్థించారు. 

గీతారెడ్డి జహీరాబాద్ నుంచి శాసనసభకు పోటీలో ఉన్నారు.  ఆమె అక్కడి నుండి గెలిచిన పక్షంలో ఆమె ముఖ్యమంత్రి అభ్యర్థిత్వానికి సిద్ధమౌతారు.  ఒకవేళ ఆమె అక్కడ గెలవకపోవటం కానీ లేదా ఆమె మీదున్న కేసుల వలన అడ్డంకి ఏర్పడినట్లయితే క్యూలో ఉన్న గద్వాల నుంచి పోటీ చేస్తున్న డి.కె.అరుణ లేదా నర్సాపూర్ నుంచి పోటీ చేస్తున్న సునీతా లక్ష్మారెడ్డి ముఖ్యమంత్రి అవకాశాన్ని పొందగలుగుతారు.

మొత్తానికి రాహుల్ గాంధీ ప్రకటన వెనక రాజకీయ చాతుర్యం, చక్కని వ్యూహం దాగి ఉన్నాయని కాంగ్రెస్ పార్టీ నేతలు ఆనందపడుతున్నారు. 

-శ్రీజ