కాంగ్రెస్ ఇప్పట్లో కోలుకోలేని స్థితి

Posted: 08/03/2013 01:10 PM IST

ముఖ్యమంత్రి కిరణ్ కుమార్ రెడ్డి శుక్రవారం సీమాంధ్రనేతలతో సమావేశమైనప్పుడు రాష్ట్ర విభజన విషయంలో తన ఆవేదనను వారితో పంచుకున్నారు. 

పార్టీ తీసుకున్న నిర్ణయం వలన చాలా సంవత్సరాలవరకు కోలుకోలేకపోతుందని, కొత్త రాష్ట్రంలో కాంగ్రెస్ పార్టీ పుంజుకోవటానికి 20 సంవత్సరాలు పట్టినా పట్టవచ్చని కిరణ్ కుమార్ అన్నారు.  అయితే సీమాంధ్ర నేతలు పట్టిన రాజీనామా దారి వారిని ఎటూ తీసుకుని పోలేవని, తమ వాదనని అసెంబ్లీలో వినిపించే అవకాశాన్ని కూడా కోల్పోయినవారవుతారని ఆయన సూచించారు. 

రాష్ట్ర వ్యవహారాలను సమీక్షించే బాధ్యతలను మోస్తున్న దిగ్విజయ్ సింగ్ ని రాష్ట్రానికి పిలిపించి సీమాంధ్రుల మనోగతాలను అర్థం చేసుకునేట్టుగా చేస్తానని కిరణ్ కుమార్ సీమాంధ్ర నేతలకు మాటిచ్చారు. 

అయితే కిరణ్ కుమార్ రెడ్డి అంతరంగంలో, తెలంగాణా విషయంలో ఇక కాంగ్రెస్ పార్టీ వెనక్కి తగ్గే అవకాశం లేదన్న విషయం వేధిస్తున్నదని ఆయన మాటల్లో స్పష్టంగానే తెలుస్తోంది.

-శ్రీజ