యూనిసెఫ్ సూచనలు

Posted: 04/20/2013 05:55 PM IST

చిన్నపిల్లల సంక్షేమం కోసమే ఏర్పడ్డ యూనిసెఫ్ ఢిల్లీలో ఐదు సంవత్సరాల బాలిక మీద జరిగిన అత్యాచారాన్ని తీవ్రంగా ఖండిస్తూ అటువంటి నేరాలకు శిక్షలు కఠినంగా ఉండాలని కోరింది. 

భారతదేశంలో ఇళ్ళల్లో కానీ బళ్ళల్లో కానీ, వీధుల్లో కానీ, పనిచేసే స్థలాల్లో కానీ చిన్న పిల్లలు, మహిళలు భయం లేకుండా ఉండగలిగే పరిస్థితిని ఏర్పాటు చెయ్యటం తక్షణమే చేపట్టాలన్న విషయం, విషమ పరిస్థితిలో కొట్టుమిట్టాడుతున్న ఢిల్లీ బాలిక ఉదంతం స్పష్టం చేస్తుందంటూ యూనిసెఫ్ ఢిల్లీ శాఖ ఘాటుగా స్పందించింది. 

అత్యాచారాలకు సంబంధించిన వివరాలను తెలియజేస్తూ, యూనిసెఫ్ 2011 లో ఇండియాలో పిల్లల మీద 30000 నేరాలు జరిగాయని, అందులో మూడో వంతు అత్యాచారం కేసులేనని చెప్పింది.  సంవత్సరంలో 7200 బాలికలు అందులోనూ చిన్నపిల్లలు అత్యాచారానికి గురౌతున్నారన్న డేటా వేదనను కలిగిస్తోంది ఎందుకంటే రిపోర్ట్ చెయ్యని కేసులు ఇంకా ఉండవచ్చు కాబట్టి అని యూనిసెఫ్ ప్రకటించింది. 

ఢిల్లీలో కదులుతున్న బస్సులో జరిగిన సామూహిక అత్యాచారం తర్వాత కూడా భారతదేశం చట్టాలలో తగు సవరణలు చెయ్యలేకపోయిందని యూనిసెఫ్ విమర్శించింది.  తగు చట్టాలే కాదు వాటిని సమర్ధవంతంగా అమలు పరచటం ముఖ్యమని కూడా యూనిసెఫ్ సూచించింది.  ఈ వారంలో జరిగిన అత్యాచారం సంఘటన కూడా చట్టాన్ని అమలుపరచే శాఖలు ఇంకా ఎక్కువగా బాధ్యతాయుతంగా  పనిచెయ్యాలన్న విషయాన్ని తెలియజేస్తున్నాయని కూడా యూనిసెఫ్ చెప్పటం జరిగింది. 

మేము మా అభిప్రాయంగా దీనికి జోడిస్తున్నదేమిటంటే, చట్టాలను కఠినతరం చెయ్యటం వాటిని సమర్ధవంతంగా అమలుపరచటంతో పాటుగా యువతలోని మానసికమైన ఈ బలహీనత పోగొట్టే దిశగా కూడా ప్రభుత్వం ప్రణాళికలను సిద్ధం చెయ్యాలి.  ఈ విషయాన్ని లోగడ కొన్ని వార్తా కథనాల్లో రాయటం జరిగింది.  మలేరియా నిర్మూలన, ఎయిడ్స్ గురించి అవగాహన కోసం ప్రణాళికాబద్ధమైన ప్రచారాలు జరిగినట్లుగానే అత్యాచారమనే మానసిక బలహీనతను యువత మెదడ్లలోంచి తీసేసే ప్రణాళిక కూడా చాలా అవసరం.  శారీరకంగా ఎదగని వాళ్ళ మీద అత్యాచారమంటే అది ఆ నేరస్తుల మానసికంగా ఎదగని స్థాయిని, లేదా వక్రదిశగా ఎదిగిన విషయాన్ని తెలియజేస్తోంది.

-శ్రీజ