Posted: 11/12/2012 01:04 PM IST

దేనికైనారెడీ, ఎ ఉమెన్ ఇన్ బ్రాహ్మణిజం సినిమాల గొడవ సద్దుమణగకముందే మరో సినిమా వివాదం తెరపైకి వచ్చింది. విడుదలైన ‘బస్టాప్’ సినిమాలో విపరీతమైన ద్వంద్వార్థాలు ఉన్నాయని, ఈ సినిమా విద్యార్థులు, యువతను పక్కదారి పట్టించేలా ఉందంటూ ఎస్‌ఎఫ్‌ఐ, డీవైఎఫ్‌ఐ సంఘాలు ఆందోళనకు దిగాయి. ఆర్టీసీ క్రాస్ రోడ్డులోని సంధ్య థియేటర్‌పై విద్యార్థులు దాడి చేసి పోస్టర్‌లను, ఫ్లెక్సీలను చించివేసి, వాటిని దహనం చేశారు. నిర్మాత బెల్లంకొండ సురేశ్, చిత్ర యూనిట్ సభ్యులు సినిమా చూస్తుండగానే, వెలుపల ఆందోళన జరగడంతో కొద్దిసేపు ఉద్రిక్తత నెలకొంది. ఈ సందర్భంగా డీవైఎఫ్‌ఐ రాష్ట్ర కార్యదర్శి ఎం.బాలకాశి మాట్లాడుతూ.. బస్టాప్ సినిమాలో కళాశాల విద్యార్థులు తమ చదువుల కంటే అమ్మాయిలు, సెక్స్ వంటి అంశాలకే ప్రాధాన్యమిస్తున్నట్లుగా చూపించారని విమర్శించారు. సెన్సార్ బోర్డును వెంటనే రద్దు చేయాలని డిమాండ్ చేశారు. బస్టాప్ సినిమాలోని ద్వంద్వార్థాలను తొలగించకపోతే సోమవారం నుంచి సినిమాను అడ్డుకుంటామని హెచ్చరించారు. అనంతరం పోలీసులు ఆందోళనకారులను అరెస్టు చేశారు.