Posted: 10/16/2012 01:01 PM IST

తాలిబన్ ఉగ్రవాదుల కాల్పుల్లో గాయపడి రావల్పిండి ఆస్పత్రిలో మృత్యువుతో పోరాడుతున్న 14 ఏళ్ల పాకిస్థాన్ హక్కుల కార్యకర్త మలాలా యూసుఫ్‌జాయ్‌ని బ్రిటన్‌కు తరలించారు. అత్యాధునిక వైద్య సౌకర్యాలున్న బర్మింగమ్‌లోని క్వీన్ ఎలిజబెత్ ఆస్పత్రిలో చేర్చారు. ఆమె కోలుకుంటే మళ్లీ దాడిచేసి హతమారుస్తామంటూ తాలిబన్లు తాజాగా హెచ్చరించిన నేపథ్యంలో మలాలాను ఆస్పత్రిలో చేర్చేవరకు ఆ వివరాలను గోప్యంగా ఉంచారు. మలాలా ఆరోగ్య పరిస్థితి ఇప్పటికీ విషమంగానే ఉండడంతో మెరుగైన వైద్యం అందించడం కోసం బ్రిటన్ ప్రభుత్వం ముందుకు రావడంతో పాకిస్థాన్ ప్రభుత్వం మలాలాను బ్రిటన్‌కు తరలించాలని నిర్ణయించింది. యునెటైడ్ అరబ్ ఎమిరేట్స్ రాజకుటుంబం సమకూర్చిన ప్రత్యేక విమాన అంబులెన్స్‌లో మలాలాను తరలించారు.వైద్యానికయ్యే ఖర్చులను పాక్ ప్రభుత్వం, సైన్యం సంయుక్తంగా భరిస్తాయి.

పాక్‌లోని స్వాత్ ప్రాంతంలో మహిళలు చదువుకోరాదంటూ తాలిబన్లు జారీ చేసిన హుకుంను ధిక్కరించి తాను చదువుకుంటుండమే కాకుండా ‘విద్య మన హక్కు’ అనే నినాదంతో తోటి విద్యార్థినులను ప్రోత్సహించిన మలాలాను నేడు ప్రపంచ మానవతా వాదులంతా ప్రశంసిస్తున్నారు. కాగా, మలాలా వార్తలకు ప్రాచుర్యం కల్పిస్తున్న మీడియాపై కూడా దాడులు చేస్తామని తాలిబన్లు హెచ్చరికలు చేసిన నేపథ్యంలో పలు మీడియా సంస్థలకు, టీవీ చానళ్ల యాంకర్లకు తగిన భద్రతను కల్పించారు.