Posted: 10/03/2012 04:16 PM IST

నైజీరియాలో ఉన్మాదులు నెత్తుటేరులు పారించారు. ముబీ పట్టణంలోని అడమవా స్టేట్ యూనివర్సిటీ హాస్టళ్లలోకి రాత్రి సైనిక దుస్తుల్లో చొరబడి విద్యార్థులపై విచక్షణారహితంగా కాల్పులు జరిపారు. ఈ కాల్పుల్లో 46 మంది మృతిచెందగా మరికొందరు గాయపడ్డారు. దేశ 52వ స్వాతంత్య్ర దినోత్సవాన ఈ దారుణం చోటుచేసుకుంది. దుండగులు హాస్టళ్లలోకి ప్రవేశించిన అనంతరం విద్యార్థులను పేర్లు చెప్పాలని అడిగారని, తర్వాత వారిలో కొంతమందిని వదిలేసి తక్కినవారిపై కాల్పులు జరిపారని ఒక లెక్చరర్ వెల్లడించారు. వారు తుపాకులు, కత్తులతో దాడి చేశారన్నారు. అయితే, ఈ దాడికి ఎవరు పాల్పడ్డారో తెలియరాలేదు. కాగా, ఈ ప్రాంతంలో ‘బొకో హరమ్’ అనే ముస్లిం తీవ్రవాద సంస్థ తరచూ దాడులు చేస్తూ ఎంతోమందిని పొట్టనపెట్టుకుంటోంది. పాశ్చాత్య సంస్కృతిని నిరసిస్తూ ప్రజలను బలవంతంగా ఇస్లాం మతంలోకి మార్చి.. షరియా ప్రభుత్వాన్ని ఏర్పాటు చేసే లక్ష్యంగా ఈ సంస్థ దాడులకు పాల్పడుతోంది.