Posted: 09/05/2012 11:27 AM IST

బయటికెళ్లి సంపాదిస్తే తెలుస్తుంది.. అదెంత కష్టమో! ఇంట్లో కూర్చుంటే ఏం తెలుస్తుంది? అయినా పొద్దున నేను ఆఫీసుకు, పిల్లలు స్కూలుకు వెళ్లి తిరిగొచ్చే దాకా ఖాళీగా కూర్చోవడం తప్ప చేసే పనేముంది? ...దాదాపు ప్రతి ఇంట్లోనూ వినిపించే మొగుడి మాట ఇది! ఇంటెడు చాకిరీ చేస్తున్నాను, అయినా నాకు గుర్తింపు లేదు! ఇంత పని చేస్తున్నందుకు నాకేమన్నా మీరు జీతమిస్తున్నారా? నేను చేసే పనికి లెక్క కడితే మీకన్నా ఎక్కువ సంపాదించినట్టే! ...ఇల్లాళ్ల తిరుగులేని జవాబు ఇది! ఆదివారమొస్తే మగవాళ్లకు పండగే! పొద్దున్నే పేపరు ముందేసుకుని కూర్చుంటారు. ఆరారగా కాఫీలూ టీలూ తాగుతూ.. టిఫిన్లు కానిచ్చి టీవీ ముందు సెటిలైపోతారు. పండగొచ్చినా పబ్బమొచ్చినా అంతే. కానీ, గృహిణులకు పాపం అలాంటి వెసులుబాట్లేవీ ఉండవు. పైగా, సెలవు రోజుల్లో వారు చెయ్యాల్సిన చాకిరీ పెరిగిపోతుంది! అదంతా జీతం బత్తెం లేని పనే! అయితే, ఇకపై మహిళలు తమ శ్రమకు గుర్తింపు లేదని బాధపడక్కర్లేదు! వారు చేసే చాకిరీకి మూల్యం పొందే రోజు మరెంతో దూరంలో లేదు.

భార్య చేసే సేవలకు భర్త నెలకింతని ఇవ్వాల్సిందేనంటూ కేంద్ర మహిళా శిశు సంక్షేమ శాఖ ప్రతిపాదనలు ఫలిస్తే గృహిణులకూ నెల జీతం దక్కడం ఖాయం. ఈమేరకు ఆ శాఖ ఇప్పటికే కసరత్తు ప్రారంభించింది. ముసాయిదా బిల్లుకు రూపకల్పన చేస్తోంది. ఆ బిల్లును త్వరలోనే కేబినెట్ ముందుకు తీసుకొచ్చే ఆలోచనలో ఉంది. మహిళా సాధికారతకు ప్రభుత్వం చేపట్టిన చర్యల్లో భాగంగానే ఈ ఆలోచనకు రూపకల్పన చేస్తున్నామని ఆ శాఖ సహాయ మంత్రి కృష్ణ తీర్థ్ తెలిపారు.ముసాయిదా బిల్లు తయారవగానే ఆరునెలల్లోగా కేబినెట్ ముందు పెడతామని వివరించారు. ఒకవేళ అన్నీ కుదిరి ఈ బిల్లు చట్టరూపం దాల్చితే.. ప్రతి భర్తా తన భార్య పేరిట బ్యాంకు ఖాతా తెరిచి, తమ జీతంలో 10 నుంచి 20 శాతం మొత్తాన్ని ఆ ఖాతాలో నెలనెలా జమ చేయాల్సి ఉంటుంది. రోజు కూలీల నుంచి అత్యున్నత స్థాయి అధికారుల దాకా అందరూ దీని పరిధిలోకి వస్తారు.