Posted: 08/20/2012 01:48 PM IST

క్రికెట్ దేవుడు సచిన్ టెండూల్కర్ చేతులమీదుగా బహుమతి అందుకోవడం ఎంతో ఆనందకరమని సైనా నెహ్వాల్ తెలిపింది. నగరంలోని ఓ హోటల్లో జరిగిన కార్యక్రమంలో చాముండేశ్వరీనాథ్, అతని స్నేహితులు కలిసి సైనా నెహ్వాల్, గోపీచంద్, పీవీ సింధులకు కార్లను బహుమతిగా అందజేశారు. ఈ కార్యక్రమానికి హాజరైన సచిన్ ఈ ముగ్గురికీ కారు తాళం చెవులను అందించాడు. లెజెండరీ క్రికెటర్ తమకు బహుమతిని అందించడం పట్ల సైనా, సింధు ఆనందంతో ఉబ్బితబ్బిబ్బయ్యారు. సినీ హీరో నాగార్జున తదితరులు ఈ కార్యక్రమంలో పాల్గొన్నారు. కల సాకారమైంది..: తన తొమ్మిదో ఏటనుంచే ఒలింపిక్ పతకం సాధించినట్టుగా కలలు కనేదాన్నని సైనా చెప్పింది. ఇప్పుడా కల సాకారమయ్యే దిశగా కృషిచేసిన గోపీసార్‌కు కృతజ్ఞతలు చెప్పుకుంటున్నానని తెలిపింది. గత కొన్నేళ్లుగా గోపీ తన కోసం కఠోరంగా శ్రమించారని చెప్పింది. తన ఈ ఒలింపిక్ పతకంతో దేశంలో బ్యాడ్మింటన్ ముఖచిత్రం మారిపోయే అవకాశముందని, క్రికెట్ అంత కాకపోయినా ఎంతో కొంత ఆదరణ పెరగడం ఖాయమని సైనా చెప్పుకొచ్చింది.