Posted: 08/17/2012 07:33 PM IST

 చార్జింగ్ పెట్టిన సెల్‌ఫోన్‌ను పట్టుకోవడంతో విద్యుదాఘాతానికి గురై తల్లీకొడుకులు మృతిచెందారు. ఈ సంఘటన తెల్లవారుజామున మాడ్గుల మండలం ఆర్కపల్లిలో చోటుచేసుకుంది. గ్రామానికి చెందిన బావండ్లపల్లి ముత్తమ్మ(49), ఆమె కొడుకు వెంకటేష్(24) రాత్రి భోజనం చేసిన తర్వాత ఎప్పటిలాగే ఇంట్లో పడుకున్నారు. వెంకటేష్ తన సెల్ ఫోన్‌కు చార్జింగ్ పెట్టి పక్కనే ఉంచాడు. తెల్లవారుజామున అతడు సెల్‌ను తీసుకుంటుండగా ప్రమాదవశాత్తు విద్యుదాఘాతానికి గురయ్యాడు. పక్కనే వున్న తల్లికూడా కరెంట్ షాక్ తగలడంతో ఇద్దరూ అక్కడికక్కడే ప్రాణాలొదిరారు. మృతుడు వెంకటేష్ ఇటీవల కల్వకుర్తి నియోజకవర్గ యూత్‌కాంగ్రెస్ ప్రధాన కార్యదర్శిగా నియమితుడయ్యాడు. పోలీసులు కేసు దర్యాప్తు చేస్తున్నారు.