Posted: 07/17/2012 02:51 PM IST

రిజర్వ్ బ్యాంక్ ఆఫ్ ఇండియా (ఆర్‌బిఐ) వడ్డీరేట్లను తగ్గించే అవకాశం లేదు. ఈ విషయం ఆర్‌బిఐ గవర్నర్ సుబ్బారావు పరోక్షంగా చెప్పారు. ద్రవ్యోల్బణం ఇప్పటికీ తాము ఆశించిన స్థాయికంటే చాలా ఎగువన ఉందని సుబ్బారావు అన్నారు. విధానపరమైన చర్యలకు వెసులుబాటు లభించాలంటే ద్రవ్యోల్బణం 5 శాతం స్థాయిలో ఉండాలని సుబ్బారావు అన్నారు. హోల్‌సేల్ ధరల ఆధారిత ద్రవ్యోల్బణం 7.25 శాతం, వినియోగదారుల ధరల సూచి ఆధారిత ద్రవ్యోల్బణం రెండంకెల స్థాయిలో ఉండటాన్ని ఆయన ప్రస్తావించారు. ఈ నెలాఖరులో ఆర్‌బిఐ ద్రవ్య పరపతి విధాన సమీక్ష చేపట్టనుంది. జూన్ నెల ద్రవ్యోల్బణం గత ఏడాదితో పోలిస్తే ఈ జూన్‌లో భారీగా తగ్గడంతో వడ్డీరేట్లు తగ్గింపు ఖాయమంటూ కొందరు ఎనిలిస్టులు అంచనావేశారు. సుబ్బారావు వ్యాఖ్యలతో వారి అంచనాలు అడ్డం తిరిగే అవకాశం ఉంది. ఆర్‌బిఐ తీసుకునే చర్యలకు ఈ ద్రవ్యోల్బణం గణాంకాలు సూచికాలు కాదని అంటూనే తాము కోరుకుంటున్న స్థాయి కంటే ద్రవ్యోల్బణం హెచ్చు స్థాయిలో ఉందని సుబ్బారావు వ్యాఖ్యానించారు. ఆర్‌బిఐ మాజీ గవర్నర్ ఐజి పటేల్ రాసిన వ్యాసాల సంకలాన్ని సుబ్బారావు ఆవిష్కరించారు. ఈ సంకలనాన్ని ఆర్‌బిఐ మరో మాజీ గవర్నర్ యాగా వేణుగోపాలరెడ్డి ఎడిట్ చేశారు.