Posted: 07/03/2012 10:47 AM IST

వైఎస్‌ఆర్ కాంగ్రెస్ పార్టీ అధ్యక్షుడు వైఎస్ జగన్మోహన్‌రెడ్డి ప్రస్తావన లేని తొలి సభను టిడిపి విజయవంతంగా నిర్వహించింది. గత కొంత కాలంగా టిడిపి రైతు ధర్నా అయినా ఎన్టీఆర్ భవన్‌లో విలేఖరుల సమావేశం అయినా, శిక్షణా కార్యక్రమం అయినా పేరు ఏదైనా ప్రధానంగా జగన్ గురించే మాట్లాడేవారు. ఉప ఎన్నికల వరకు ఇదే తంతు సాగింది. అయితే ఉప ఎన్నికల ఫలితాల తరువాత హఠాత్తుగా తమ వ్యూహం మార్చేశారు. తాము జగన్ గురించి పదే పదే మాట్లాడటం, అతిగా విమర్శలు చేయడం వల్ల అతను రాజకీయాల్లో ఎదిగిపోతున్నాడని, ఇలాంటి విమర్శల వల్ల చివరకు నష్టం మనకే జరుగుతుంది అని టిడిపి నాయకత్వం భావిస్తోంది. సమీక్షా సమావేశాల్లో ఇదే నిర్ణయానికి వచ్చారు. దాంతో ఇకపై ప్రజల సమస్యలు ప్రధానంగా రైతుల సమస్యలపై ఉద్యమించాలని, జగన్‌ను పెద్దగా పట్టించుకోనట్టుగానే ఉండాలని నిర్ణయించారు. ఉప ఎన్నికల ఫలితాల తరువాత జరిగిన టిడిపి తొలి ధర్నాలో దీన్ని బాగానే అమలు చేశారు. జగన్, కెసిఆర్‌లపై విమర్శలకే పరిమితమయ్యే టిడిపి నాయకుల ఉపన్యాసాల్లో వారి ప్రస్తావనే లేకుండా నిర్వహించారు. ఇందిరాపార్క్ వద్ద జరిగిన మహాధర్నాకు చంద్రబాబు ఉదయం 12గంటలకు వచ్చారు. ఒంటి గంటకు అరగంట పాటు ఉపన్యసించారు. రైతుల గురించి గతంలో చెప్పిన విషయాలే చెప్పినప్పటికీ ఎక్కడా జగన్ పేరు ప్రస్తావించలేదు. ఇతర నాయకులు సైతం తమ ఉపన్యాసాల్లో జగన్ పేరు పేర్కొనలేదు.