Posted: 07/01/2012 03:56 PM IST

ఆదర్శ పాఠశాలల విషయంలో రాష్ట్రప్రభుత్వం ఎట్టకేలకు నిర్ణయాన్ని ప్రకటించింది. పాఠశాలలు ఈ ఏడాది ప్రారంభించాలనుకున్నా ముహూర్తం వచ్చే యేడాదికి వాయిదా పడింది. ఇదే విషయాన్ని రాష్ట్ర మాధ్యమిక విద్యాశాఖమంత్రి పార్థసారథి ధృవీకరించారు. రాష్ట్రంలో విద్యాపరంగా వెనుకబడిన 737మండలాల్లో మోడల్ స్కూళ్ల ఏర్పాటుకు కేంద్రం గత ఏడాది అనుమతి ఇచ్చింది.  మొదటి దశలో దాదాపు పన్నెండువందల కోట్లతో 355 స్కూళ్ల నిర్మాణాలకు, ఏర్పాటుకు ఓకే చెప్పింది. ఒక్కో స్కూల్ నిర్మాణం, వసతుల కల్పనకు మూడుకోట్ల రెండు లక్షల రూపాయలు కేటాయించింది. అయితే వాటిలో ఒక్క పాఠశాల భవన నిర్మాణం కూడా పూర్తి కాకపోవడంతో ఆదర్శపాఠశాలల ప్రారంభ కార్యక్రమాన్ని వచ్చే ఏడాది చేసేందుకు ప్రభుత్వం సన్నాహాలు చేస్తోంది.
    ఈ విద్యా సంవత్సరానికిగాను 355మోడల్ స్కూళ్లు ప్రారంభించాల్సి ఉండగా భవనాలు పూర్తి కాలేదని భావించిన విద్యాశాఖ అధికారులు రాష్ట్రంలో కేవలం 132స్కూళ్లలో మాత్రమే 6, 7, 8, 11తరగతుల్లో ప్రవేశాలకు నోటిఫికేషన్ ఇచ్చారు. ఇందుకోసం 40వేల మంది దరఖాస్తు చేసుకున్నారు. ప్రభుత్వం ఎలాంటి నిర్ణయం తీసుకోకపోవడంతో గత కొద్దిరోజులుగా విద్యార్థుల తల్లిదండ్రులు వాటి చుట్టూ తిరుగుతున్నారు. ఆదర్శ ఉపాధ్యాయుల పోస్టుల భర్తీకి ప్రభుత్వం ఇప్పటికే ప్రవేశ పరీక్ష నిర్వహించడంతో పాఠశాలలు ప్రారంభమౌతాయని భావించినా వారి ఆశ తీరలేదు.  అయితే పరీక్ష ఫలితాలను ఇప్పటికీ విడుదల చేయకపోవడంతో అభ్యర్థులు ఆందోళన చెందుతున్నారు. అయితే ఈ టీచర్ పోస్టుల్లో మొదట ప్రిన్సిపాళ్ళను తీసుకున్న తర్వాతే మిగతా ఉపాధ్యాయులను తీసుకుంటామని మంత్రి పార్థసారథి అన్నారు.

...avnk