Posted: 06/28/2012 11:01 AM IST

 ఏఐసిసి ప్రధాన కార్యదర్శి రాహుల్ గాంధీ రాష్ట్ర కాంగ్రెస్‌కు చెందిన ముగ్గురు పార్లమెంటు సభ్యులతో రాష్ట్ర కాంగ్రెస్, ప్రభుత్వం పని తీరు, ప్రత్యేక తెలంగాణ రాష్ట్రం ఏర్పాటు వివాదంపై సుదీర్ఘ మంతనాలు జరిపినట్లు తెలిసింది. రాష్ట్ర కాంగ్రెస్ వ్యవహారాలకు సంబంధించి అపారమైన అనుభవం ఉన్న రాజ్యసభ సభ్యుడు కెవిపి రామచంద్రరావుతోపాటు మరో ఇద్దరు పార్లమెంటు సభ్యులను ఆయన విడి విడిగా కలుసుకుని సమాలోచనలు జరిపినట్లు పార్టీ వర్గాలు వెల్లడించాయి. ఇద్దరు పార్లమెంటు సభ్యుల్లో ఒకరు రాజ్యసభ, మరొకరు లోక్‌సభ సభ్యులని తెలిసింది. అయితే వారి పేర్లు వెల్లడికాలేదు. రాష్ట్ర వైద్య శాఖ మంత్రి డిఎల్ రవీంద్రారెడ్డి రాహుల్‌ను కలిసి చర్చలు జరిపినట్లు పార్టీ వర్గాలు చెబుతున్నాయి. కాంగ్రెస్ అధ్యక్షురాలు సోనియా గాంధీ గత వారం కెవిపితో దాదాపు అరగంట పాటు రాష్ట్ర కాంగ్రెస్ వ్యవహారాలపై సుదీర్ఘ మంతనాలు జరిపిన నేపథ్యంలో రాహుల్ గాంధీ ఆయనతో చర్చలు జరపటం ప్రాధాన్యతను సంతరించుకుందని కాంగ్రెస్ వర్గాలు చెబుతున్నాయి. కాంగ్రెస్ పార్టీని పటిష్ఠం చేసి 2014లో జరిగే లోక్‌సభ, అసెంబ్లీ ఎన్నికలను సమర్థంగా ఎదుర్కొనేలా చేసేందుకు ఎలాంటి చర్యలు తీసుకోవాలి? ప్రభుత్వం, పార్టీ నాయకత్వంలో చేయవలసిన మార్పులు, చేర్పులు ఏమిటి? తెలంగాణ సమస్యను పరిష్కరించేందుకు ఏం చేస్తే బాగుంటుందనే అంశంపై రాహుల్ ఆయనతో ప్రధానంగా చర్చించారని అంటున్నారు.