Posted: 05/01/2012 11:07 AM IST

అస్సాంలోని ధుబ్రీ జిల్లాలో బ్రహ్మపుత్ర నదిలో సోమవారం ఘోర నాటు పడవ ప్రమాదం జరిగింది. ఈ ప్రమాదంలో 103 మంది మరణించి ఉంటారని, వంద మంది దాకా గల్లంతయ్యారని అనుమానిస్తున్నారు. ప్రమాదం సంభవించిన సమయంలో పడవలో 250 మంది ఉన్నట్లు సమాచారం. గౌహతికి 350 కిలోమీటర్ల దూరంలో గల ఫకీర్‌గ్రామ్ సమీపంలో నాటు పడవ బోల్తా పడింది.

ధుబ్రీఘాట్ నుంచి పడవ నదిని దాటుతుండగా ఈ ప్రమాదం సంభవించినట్లు డిప్యూటీ కమిషనర్ కుముద్ చంద్ర కలిత చెప్పారు. ప్రమాదంలో 35 మంది మునిగిపోయినట్లు అనుమానిస్తున్నారు. కాగా, 25 మంది ఈదుతూ ఒడ్డుకు చేరుకున్నారు. జిల్లా అధికారులు సంఘటనా స్థలానికి హుటాహుటిన చేరుకున్నారు. 35 మృతదేహాలను వెలికి తీశారు. మిగతా వారి కోసం గాలిస్తున్నారు. మృతుల సంఖ్య పెరగవచ్చునని అనుమానిస్తున్నారు.  ప్రధాని మన్మోహన్ సింగ్ అస్సాం ప్రజలకు తన సంతాపాన్ని వ్యక్తం చేశారు. తగిన సహాయ చర్యలు చేపట్టాలని ఆయన అధికారులను ఆదేశించారు.