Posted: 04/24/2012 04:40 PM IST

చిన్న పిల్లలు చాక్లెట్ కోసమో లేక ఓ రూపాయి కోసమో దొంగతనాలు చేయడం చూస్తాం. కానీ ఇక్కడ ఓ బాలుడు 50 రూపాయల అప్పు తీర్చమన్నందుకు తన తల్లితో పాటు మరో ఇద్దరు మహిళల్ని కిరాతకంగా పొడిచి హత్య చేసిన సంఘటన వాయువ్య ఢిల్లీలోని జెహన్‌గిర్‌పురి అనే ప్రాంతంలో జరిగింది. పోలీసులు తెలిపిన వివరాల ప్రకారం, లోదుస్తులను తయారుచేసే కంపెనీలో పనిచేస్తున్న టీనేజ్‌ బాలుడు తన ఒకరోజు సంపాదన రూ.50ను ఖర్చు చేశాడు.

అతని తల్లి ఆ డబ్బును గురించి అడగటంతో ఆ బాలుడు తమ పొరుగున నివసిస్తున్న మహిళ నుంచి అంతే మొత్తాన్ని అప్పుగా తీసుకొని వచ్చి తన తల్లికి ఇచ్చాడు. ఆ తర్వాత ఆ పొరుగు మహిళ తను అప్పిచ్చిన డబ్బును తిరిగి తీసుకోవటానికి ఆ బాలుడి ఇంటికి వెళ్ళి అడగటంతో, తన కొడుకు అబద్దం చెప్పిన విషయం ఆమె తల్లికి తెలిసింది. కోపంతో ఆమె ఆ బాలుడిని అందరిముందు కొట్టడంతో రెచ్చిపోయిన ఆ బాలుడు దీనికంతటికి కారణమని భావించిన పొరుగు మహిళను తొలుత కత్తెరతో పొడిచాడు. కాగా అడ్డువచ్చిన ఆమె కూతురును, తన తల్లిని కూడా పొడవడంతో ముగ్గురు చికిత్సపొందుతూ మరణించారు.