Posted: 03/29/2012 11:13 AM IST

ఆస్తుల వివరాలను బహిరంగంగా వెల్లడించిన ఉత్తర ప్రదేశ్‌ తొలి ముఖ్యమంత్రిగా అఖిలేష్‌ యాదవ్‌ రికార్డుకెక్కారు. యుపి ప్రభుత్వ వెబ్‌సైట్‌లో అఖిలేష్‌ (39) తన ఆస్తుల వివరాలను వుంచారు. మూడు ఇళ్ల స్థలాలు (లక్నోలో రెండు, ఎటావాలో ఒకటి), రూ. 98 లక్షల విలువ చేసే వ్యవసాయ భూమి వున్నట్లు పేర్కొన్నారు. రూ. కోటి పెట్టుబడులతోపాటు, రూ. 1.18 కోట్ల నగదు వున్నట్లు తెలిపారు. రూ. 20 లక్షల విలువగల వాహనం, తన పేరుమీద రూ. 1.3 కోట్ల రుణం కూడా వున్నట్లు ఈ వెబ్‌ సైట్‌లో అఖిలేష్‌ పేర్కొన్నారు. ఇటీవల జరిగిన అసెంబ్లీ ఎన్నికల్లో సమాజ్‌వాదీ పార్టీ ఘన విజయం సాధించడంతో అఖిలేష్‌ ఈ నెల మొదటి వారంలో ముఖ్యమంత్రిగా బాధ్యతలు స్వీకరించిన విషయం తెలిసిందే. రాజ్యసభ అభ్యర్థిత్వానికి దరఖాస్తు చేసే సందర్భంగా మాయావతి కూడా ఈ నెలలో తన ఆస్తుల వివరాలను ప్రకటించిన విషయం తెలిసిందే.