Posted: 03/02/2012 11:30 AM IST

భక్తులంతా పరమ పవిత్రంగా భావించే తిరుమల లడ్డూలో గుట్కా ప్యాకెట్ కనిపించటంతో భక్తులంతా తీవ్ర అసంతృప్తికి లోనయ్యారు. అంతకు ముందు కూడా లడ్డూల్లో బోల్టు నట్ లు, రబ్బరు ముక్కల్లాంటి వ్యర్థపదార్థాలు కనిపించటంతో యాజమాన్యం నిరసనకు లోనవుతోంది. దానికి తోడు కొండ మీద జరిగే అసాంఘిక చర్యలు, వాటివెనక పెద్దల, నేతల పలుకుబడులు ఇవన్నీ తిరుమల తిరుపతి దేవస్థానం యాజమాన్యానికి మచ్చతీసుకునివస్తున్నాయి. ఏదైనా ఒకటి బయటపడితే అన్నీ చర్చల్లోకి వస్తాయి కాబట్టి, భక్తులు స్వామికి సమర్పించే కోటానుకోట్ల రూపాయలు దుర్వినియోగం అవుతున్నాయని, భక్తుల సౌకర్యం కోసం ఖర్చుపెట్టటం లేదని అభియోగాలు వెల్లువెత్తుతున్నాయి.

భక్తులు ఎంతో కష్టపడి స్వామి దర్శనానికి వస్తే అది క్షణం సేపటిలో అయిపోతుందని, సరిగ్గా చూడనివ్వకుండా లోపల కార్యకర్తలు తోసేస్తుంటారని, భక్తుల మీద చెయిచేసుకోవటం కూడా తరచుగా జరుగుతుంటుందని, ఆడవాళ్ళని కూడా చూడకుండా చేతులు వేసి ముందుకు తోస్తుంటారని ఏమీ అడగటానికే లేదని, ఎవరూ పట్టించుకోరని, వెనక దర్శనం కోసం వేచియున్న భక్తలు కోసం నిర్వహణ అవసరమే అయినా అమానుషంగా ప్రవర్తిస్తుంటారని ఆరోపణలు వస్తుంటాయి. విఐపిలకు మాత్రం సులభంగా స్వామి దర్శనం జరిగిపోతుంది. దీనంతటికీ కారణం తితిదే యాజమాన్యం ప్రభుత్వ శాఖ నిర్వహించటం, చైర్మన్ గా రాజకీయ పలుకుబడి కలవారికే దక్కటం, వాళ్ళ తమ పదవిని కాపాడుకోవటం కోసం భక్తుల మొరలను దేవుడికే వదిలేసి విఐపిల సౌకర్యం మాత్రం స్వయంగా చూసుకోవటం.

-శ్రీజ