Posted: 02/28/2012 04:06 PM IST

స్వలింగసంపర్కం విషయంలో సుప్రీం కోర్టుతో మీమాటే మామాట అని కేంద్ర ఆరోగ్యశాఖ తరఫున మోహన్ జైన్ ప్రకటించి సుప్రీం కోర్టు నిరసనకు గురయ్యారు. అనీతి, సాంప్రదాయాలకు విరుద్ధమంటూ హైకోర్ట్ ఆర్డర్ ని వ్యతిరేకించిన కేంద్ర హోం శాఖ తరఫున అదనపు సొలిసిటర్ జనరల్ పి.పి.మల్హోత్రా, మూడు గంటలపాటు తన వాదనలు వినిపించిన తర్వాత, ఈ విషయంలో ప్రభుత్వం జోక్యం చేసుకోవటం లేదని, హైకోర్టు ఆదేశాలను వ్యతిరేకించటం లేదని తనకి ఆదేశాలిచ్చినట్టుగా సుప్రీంకోర్టు కి తెలియజేయటంతో మండిపడ్డ జస్టిస్ జి.ఎస్ సింఘ్వి, జస్టిస్ ఎస్.జె.ముఖ్యోపాధ్యాయల ధర్మాసనం, న్యాయవ్యవస్థను వెక్కిరించకండని అన్నారు. "మూడు గంటల పాటు ఎఎస్ జి మల్హోత్రా వాదిస్తున్నారు, వారి వాదనను మేము నోట్ చేసుకున్నాం. ఇప్పుడు మీరొచ్చి మీ మంత్రిత్వ శాఖ అభిప్రాయమేమిటో చెప్తున్నారు. మా తీర్పు మీ శాఖ మీకిచ్చే ఆధేశాల మీద ఆధారపడివుండ"దని వ్యాఖ్యానించారు.

భారతీయ శిక్షాస్మృతి లోని సెక్షన్ 377 (ప్రకృతివిరుద్ధమైన చర్యలు) ప్రకారం స్వలింగ సంపర్కం నేరం. అందుకు జీవిత ఖైదు వరకూ శిక్షను విధించవచ్చు. దీనిని సవరిస్తూ హైకోర్టు 2009 లో స్వలింగులను నేరస్తుల జాబితా నుంచి తప్పించారు. దానిని భాజపాతో సహా మతపరమైన సంస్థలెన్నో వ్యతిరేకించాయి. "సహజీవనం ఒకప్పుడు నేరం ఇప్పుడు కాదు, అలాగే మారుతున్న కాలాన్నిబట్టి న్యాయశాస్త్రంలో ఎన్నో మార్పులు చోటు చేసుకున్నాయి, అలాగే స్వలింగులు ఇష్టపూర్వకంగా ప్రైవేటుగా శృంగారంలో పాల్గొంటే తప్పు కాదు" అని అన్న సుప్రీం కోర్టు మాటలను ముస్లిం సంఘాలు, క్రిస్టియన్ సంఘాలు, బాబా రామ్ దేవ్ తో సహా మరికొన్ని యోగ సంఘాలు, వ్యతిరేకించాయి.

ఒకే విషయం మీద ఒక మంత్రిత్వ శాఖ వాదిస్తుంటే మరో శాఖ నుంచి "అయితే సరే, మీమాటే మామాట" అనేటప్పటికి ధర్మాసనం ఆగ్రహంవహించింది.

-శ్రీజ