Posted: 02/27/2012 03:01 PM IST

కోవూరు ఉప ఎన్నికలలో పోటీ చెయ్యటానికి తెరాస సిద్ధంగా ఉన్నదని ఆ పార్టీ అధ్యక్షుడు కె చంద్రశేఖర రావు అన్నారు. కోవూరులో ఉప ఎన్నికల్లో పోటీ చెయ్యటమే కాదు చంద్రబాబు ఆగడాలను ఎండగడతామని కూడా కెసిఆర్ సవాలు చేసారు. వ్యూహాత్మకంగా నెల్లూరుకి చెందిన అభ్యర్థినే తెరాస తరఫున నిలబెడతామని, అతని తరఫున ప్రచారం చెయ్యటానికే ప్రత్యేకంగా ఒక కమిటీని ఏర్పాటు చేస్తామని కెసిఆర్ అన్నారు. తెలంగాణా తెదేపా నేతలు ఆత్మపరిశీలన చేసుకోవాలని పిలుపునిస్తూ, తెలంగాణా ఫోరంలో నేత ఎప్పటికైనా తెదేపా అధ్యక్షుడు కాగలడా అని ప్రశ్నించారు.  తెలంగాణా ఫోరం కేవలం బానిస ఫోరంగా పరిగణిస్తామని కెసిఆర్ అన్నారు. తెదేపా తెరాసల మధ్య వాగ్యుద్ధం గత కొద్ది రోజులుగా నడుస్తూనేవుంది. ఇద్దరూ మరోపార్టీ కాంగ్రెస్ తో కుమ్మక్కయిందని పరస్పరారోపణలూ జరుగుతూనేవుంటాయి.

ఈ సందర్భంలో మాట్లాడుతూ నిన్న తెదేపా నేత తలసాని శ్రీనివాస్ యాదవ్, కోవూరులో కాదు, అసలు తెరాస తెలంగాణా లో ఎన్ని సీట్లు సంపాదించుకుంటుందో ముందు తేల్చుకోవాలని కెసిఆర్ కి సూచించారు. గత ఎన్నికల్లో వచ్చినంత మెజార్టీ రాకపోతే తెరాసను మూసేస్తార అని కూడా అడిగారు. బజారు భాష మాట్లాడే కెసిఆర్ కి జవాబు చెప్పటానికే వ్యక్తిత్వం అడ్డు వస్తున్నదని శ్రీనివాస్ యాదవ్ కెసిఆర్ ని దుయ్యబట్టారు. డిసెంబరు 9 న చేసిన ప్రకటన అనుకూలంగా ఉండబట్టి చిదంబరం తన వలనే ఆ ప్రకటన చేసారని అన్న కెసిఆర్, మరి 23 న చేసిన ప్రకటన కూడా తన వలనే చేసారేమో తెలంగాణా ప్రజలకు చెప్పారని తలసాని అన్నారు.

-శ్రీజ