Posted: 02/06/2012 01:51 PM IST

రాష్ట్రంలో  త్వరలో జరగనున్న  ఉప ఎన్నికల్లో  సీపీఎం  ఒంటరిగా  పోటీ చేసేందుకు  సిద్దమవుతోంది.  ఈ ఎన్నికల ద్వారా  తమ బలాన్ని  అంచనా  వేసుకునేందుకు  గెలుపోములతో  నిమిత్తం  లేకుండా  కొన్ని  నియోజకవర్గాలలో  స్వతంత్రంగా  పోటీ చేయాలని  ఆ పార్టీ  నిర్ణయించింది.  పార్టీకి  బలమున్నచోట్ల సీపీఎం  అభ్యర్థులు  నేరుగా బరిలోకి దిగుతారు.  మిగిలిన  నియోజకవర్గాల్లో  ఇతర  వామపక్ష  పార్టీలతో  చర్చించి  ఉమ్మడిగా  సీట్ల  సర్థుబాటు  చేసుకోవాలని  ఆ పార్టీ  రాష్ట్ర నాయకత్వం  భావిస్తోంది.  ఈ ప్రక్రియను ఉప ఎన్నికలు  ప్రకటించిన తర్వాతే  ప్రారంభించాలని  నిర్ణయించుకుంది.  మరోవైపు  ప్రజల  సమస్యలను  ఉమ్మడి  కార్యాచరణ  రూపొందించి  పోరాటాలను వేగం పెంచాలని  సీపీఎం  యోచిస్తోంది.  తెలంగాణ తదితర  అంశాల  విషయంలో  సీపీఐతో  సిద్దాంతపరమైన  వైరుధ్యాలున్నప్పటికి , వాటిని పక్కనబెట్టి  ఆ పార్టీతో  కలిసి  పనిచేసేందుకు  మార్క్సిస్టులు  సిద్దమవుతున్నారు.  ఇదే  పంథాను అనుసరించాలని  సీపీఎం  నిర్ణయించింది.