Posted: 01/27/2012 11:22 AM IST

యానాంలో రీజెన్సీ సిరామిక్స్ కంపెనీలో కార్మికులు ఆందోళన చేపట్టారు. ఆందోళనకారులను చెదరగొట్టటానికి పోలీసులు తమదైన శైలిలో చర్యలు తీసుకున్నారు. అరెస్టయిన కార్మిక నాయకుడు మురళీమోహన్ దెబ్బలు తగిలి హాస్పిటల్ లో వైద్య చికిత్సలు చేస్తుండగానే మరణించారు. దానితో పోలీసుల చర్య వలనే మురళీమోహన్ మరణించారని కార్మికులంతా ఆందోళనను ఉధృతం చేసారు. దాదాపు 100 మందిని అరెస్ట్ అయిన ఈ సంఘటనలో వాహనాలు ధ్వంసమయ్యాయి. రీజెన్సీ విద్యాసంస్థలమీద దాడి జరిగింది. పోలీసులో మురళీమోహన్ హంతకులని కార్మికులు ఆందోళనను ఇంకా తీవ్రతరం చేసారు.

కార్మికులు పోలీస్ స్టేషన్ ఎదురుగా ధర్నా చేస్తూ పోలీస్ స్టేషన్ ని ముట్టడించే ప్రయత్నం చెయ్యగా పోలీసులు కాల్పులు జరిపారు. కొందరు కార్మికలకు గాయాలు జరిగాయి. ఇంకా పరిస్థితి అదుపులోకి రాలేదు. కార్మికులు ఇంకా రెచ్చిపోయి వాహనాలనే కాకుండా పెట్రోల్ పంపుని కూడా తగలబెట్టటంతో స్థానికులు కూడా భయాందోళనలకు గురవుతున్నారు.

యాజమాన్యంలో నిర్లక్ష్య వైఖరే దీనికంతటికీ కారణమని కార్మికుల నాయకులు చెప్తున్నారు. కార్మిక సంఘం పెట్టుకోదలచుకున్న కార్మికులను అణచివేయటమే కాకుండా కొందరిని ఉద్యోగాలనుంచి తొలగించారు. ముఖ్యంగా కార్మిక నాయకుడు మురళీమోహన్ ని ఉద్యోగం లోకి తీసుకోవటానికి యాజమాన్యం తిరస్కరించింది. ఆ కార్మిక నాయకుడిని పోలీసులు లాఠీలతో దారుణంగా కొట్టటంతోనే అతను చనిపోయాడని హానరబుల్ ప్రెసిడెంట్ హర్షద్ కుమార్ అన్నారు.

-శ్రీజ