Posted: 01/25/2012 01:22 PM IST

450 సంవత్సరాలుగా హైద్రాబాద్ నగరానికే ఒక లోగో లాగా విశిష్టతను సంతరించుకుని ఉన్న చార్మినార్ కి కేంద్ర పర్యటక శాఖ మెగా టూరిస్ట్ డెస్టినేషన్ హోదాను కలుగజేసింది. దేశవ్యాప్తంగా ఈ హోదాను కలిగించిన 45 ప్రదేశాలలో 3 మన రాష్ట్రానికే దక్కాయి. చార్మినార్ తో పాటు తిరుపతి, కడప హెరిటేజ్ సర్క్యూట్ లు దక్కించుకున్న ఈ మెగా టూరిస్ట్ డెస్టినేషన్ హోదా వలన కేంద్ర ప్రభుత్వం నుంచి 50 కోట్ల వరకూ నిధులు సమకూరుతాయి.

రాష్ట్ర ప్రభుత్వాలు పంపించిన ప్రతిపాదనలను పరిశీలించిన మీదట ఆయా స్థలాల్లో సందర్శించే పర్యాటకులు, అభివృద్ధి పరచటానికి ఉన్న అవకాశాలను దృష్టిలో పెట్టుకుని హోదాలను నిర్ణయించటం, వాటి అభివృద్ధికి కావలసిన నిధులను మంజూరు చెయ్యటం జరుగుతుందని కేంద్ర పర్యాటక శాఖ తెలియజేసింది.

ఇంత చేసామని చెప్పుకోవటానికే ఇంత వరకూ పనికివచ్చింది కానీ పర్యాటక రంగంలో భారత దేశం మిగిలిన దేశాలకు తీసికట్టని చెప్పక తప్పదు. ఎన్నో సహజ వనరులు, సహజ సౌందర్యాలకు నిలయమైన భారతదేశంలో విదేశీయులను ఆకర్షించటానికి ఎన్నో ప్రదేశాలున్నాయి. చారిత్రాత్మక ప్రసిద్ధి గాంచిన చార్మినార్ ను హైదరాబాద్ వచ్చిన ప్రతివారూ సందర్శిస్తారు. కానీ తీరా చూసిన తర్వాత నిరాశతో వెనక్కి పోయేవారే చాలామంది. పైకి ఎక్కటానికి అనుమతి లేదు. కింద నుంచి చూడటానికి పెద్ద సమయమేమీ పట్టదు. తీరిగ్గా కూర్చుందామంటే రద్దీ ప్రదేశం. అక్కడికి వెళ్ళినదానికంటే ఫొటోలోనే బావుంది అనిపిస్తుంది చాలామందికి. పర్యాటక స్థలానికి పోయినప్పుడు పర్యాటకులలో ఉత్సాహాన్ని నింపేదిగా ఉండాలి. అందుకు ఏం చెయ్యాలన్నది పర్యాటక శాఖ ఆలోచించి అమలు పరచాలి కానీ పేపరు మీద ఇన్ని కోట్లు ఖర్చు పెట్టాం అంటే కాదు ఎంత మందిని అలరించారన్నది ముఖ్యం.

-శ్రీజ