Posted: 01/23/2012 12:27 PM IST

విద్యార్థుల మధ్య ఉన్న సన్నిహిత సంబంధాల వలన వారి మధ్య స్నేహం, అది ముదిరి ప్రేమలోకి పరిణమించిన ఉదంతాలుండేవి ఒకప్పుడు. వాటి స్థానంలో ఉపాధ్యాయులు, ముఖ్యంగా ప్రధానోపాధ్యాయులు విద్యార్థినుల మీద అనైతికంగా ప్రవర్తించటం వెలుగు చూసింది. తాజాగా బెంగళూరులో ఒక ప్రధానోపాధ్యాయుడు ఏడవ తరగతి చదువుతున్న బాలుడి మీదనే తన అసభ్యశృంగార చేష్టలకుపక్రమించటం వివాదానికి దారితీసింది. తన ఛాంబర్ కి పిలిపించుకుని అర్థంపర్థంలోని ప్రశ్నలు వెయ్యటం, అతనికి సోషల్ నెట్ వర్క్ సైట్లలో అసభ్యకరమైన సందేశాలివ్వటం చేస్తూ చాలా రోజులుగా వేధిస్తున్న నేపథ్యంలో ఆ అబ్బాయి తల్లిదండ్రులకు ఫిర్యాదు చెయ్యటం, వారు స్కూలు యాజమాన్యం దగ్గరా పోలీసుల దగ్గరా ఫిర్యాదు చెయ్యటం జరిగి విషయమంతా బహిర్గతమవటంతో కీచకుడు కూడా ఇష్టపడని స్వలింగ వేధింపులకు పాల్పడ్డ ఆ ఉపాధ్యాయుడు దేశం విడిచి పోదామని ప్రయత్నం చెయ్యగా పోలీసులు అతని పాస్ పోర్ట్ ను తమ ఆధీనంలోకి తీసుకున్నారు.

భారత్ కి రాకముందు అరబ్ దేశాలలో పనిచేసిన బ్రిటిష్ పౌరసత్వంగల ఆ ప్రధానోపాధ్యాయుడిని శాశ్వతంగా పదవి నుంచి తప్పిస్తున్నామని స్కూల్ యాజమాన్యం ప్రకటించింది. ఈ విషయం తమ దృష్టికి వచ్చినప్పుడు నిర్ఘాంతపోయామని, ఎంతో మనస్తాపానికి గురయ్యామని చెప్పిన యాజమాన్యం, ఇలాంటి ఫిర్యాదునింతవరకూ ఏ విద్యార్థి గాని, విద్యార్థి తల్లిదండ్రులు కానీ ఇంతవరకూ చెయ్యలేదని అన్నారు.

బాలల న్యాయం (సంరక్షణ, భద్రత) చట్టం 2000, సమాచార చట్టం 2000 కింద, అరెస్ట్ చేసి బెయిల్ మీద విడుదల చేసిన ఆ అధ్యాపకుడి మీద నమోదు చేసిన కేసు బాపతు ఎఫ్ఐఆర్ కాపీని బ్రిటిష్ హై కమిషన్ కి పంపించారు.

-శ్రీజ