Posted: 01/17/2012 12:49 PM IST

ముఖ్యమంత్రి కిరణ్ కుమార్ రెడ్డి నవంబరు 5 న రాష్ట్రంలోని ప్రధాన రహదారులకు జాతీయ హోదా కల్పించాలంటూ కేంద్రాన్ని కోరిన రహదారులు 11, మొత్తం 1981 కిలోమీటర్లు. ప్రతిపాదన పంపించారు. కానీ రాష్ట్ర ఎంపీల మధ్యనే సామరస్యం లేక పోవటంతో మా ప్రాంతానికి కావాలి, వాళ్ళ ప్రాంతానికి వద్దు అనే వాదనలతో అసలుకే ముప్పు తెస్తున్నారని ఆరోపణలు వస్తున్నా, అసలు వడ్డించేవారు మనవాళ్ళయితే ఎక్కడ కూర్చున్నా ఒకటే నని, కేంద్రానికి మన రాష్ట్రం మీద సవతితల్లి ప్రేమ మొదటి నుంచీ కనపడుతున్నదే. దానికి కారణం మనవాళ్ళ మెతకదనం, కేంద్రానికి దాసోహమనటమేనని ప్రతిపక్షాలెప్పుడూ ఆరోపిస్తూనేవున్నాయి. ఈ ఆరోపణలో సత్యం లేదనటానికి కూడా లేదు. మన రాష్ట్రానికి కేంద్రలో ప్రాతినిధ్యం వహించే ఎంపీలకేమీ కొదవు లేదు. కానీ ఏ పనులూ ఆ స్థాయిలో కావు. మంత్రిత్వ శాఖలు కానీ గ్రాంట్లు కానీ చెప్పుకోదగ్గ స్థాయిలో రావు. విపక్షాలు పాలించే రాష్ట్రాలే నయమనిపిస్తాయి.

జాతీయహోదా కోరిన రహదారుల వివరాలు- 1. హైద్రాబాద్- శ్రీశైలం- ఆత్మకూరు- నంద్యాల, 2. సంగారెడ్డి- అకోలా వయా నాందేడు, 3. అనంతపురం- రాయచూర్ వయా ఉరవకొండ, 4. నిర్మల్-ఖానాపూర్-లక్సెట్టిపేట, 5. కాకినాడ- ద్వారపూడి- రాజమండ్రి- కొవ్వూరు- జంగారెడ్డిగూడెం- అశ్వారావుపేట- ఖమ్మం- సూర్యాపేట, 6. హైద్రాబాద్- బీజాపూర్ రోడ్డు- మొయినాబాద్- చేవెళ్ళ- మన్నెగూడ- కొండగల్, 7. రాయచోటి- చిన్న మండెం- గుర్రం కొండ- కురబాలకోట, 8. కృష్ణపట్నం పోర్టు- తల్లపాలెం- 9. నర్సీపట్నం- చింతపల్లి- సీలేరు- డొంకరాయి- మోతుగూడెం- లక్కవరం- చింతూరు, 10. తడ- శ్రీకాళహస్తి- రేణిగుంట, 11. పెనుగొండ- మడకశిర- హిరాయూర్.

దీని వలన రాష్టంలో దేవాలయాలు, ఓడరేవులు, పారిశ్రామకవాడలకు మధ్య రాకపోకలు సౌకర్యవంతంగా అవుతాయన్న దృష్ట్యా ఇది చాలా మంచి ప్రతిపాదనే కానీ, రెండు వేల కిలోమీటర్ల రోడ్డుకి జాతీయా హోదా కల్పించవలసిందిగా కేంద్ర ప్రణాళికా సంఘం ఎప్పుడో సూచించినా దానికింతవరకూ అతీ గతీ లేదు.

దేశ వ్యాప్తంగా 10000 కిలోమీటర్ల రోడ్లను పునరుద్ధరించాలని కేంద్ర ప్రభుత్వం ప్రస్తుత ఆర్థిక సంవత్సరానికి ప్రణాళిక వేసినా, మన రాష్ట్రం విషయంలో కేంద్ర రవాణా శాఖ నిర్లిప్తత చూపిస్తోంది. ఒకే పార్టీలో కూడా ఉన్న అంతర్యుద్ధాలు సమసిపోయి ముక్తకంఠంతో అడిగితే కానీ రాష్ట్ర ప్రతిపాదనలను కేంద్రం పట్టించుకోదు. అంతేకానీ ముఖ్యమంత్రి పంపించిన ప్రతిపాదనలు ఆయన సొంత వ్యవహారమన్నట్టుగా మంత్రులు, ఎంపీలు ప్రవర్తిస్తే రాష్ట్రంలో ఎక్కడ వేసిన గొంగళి అక్కడే ఉంటుంది, చివరకు చెదలు పడుతుంది.

-శ్రీజ