Posted: 01/12/2012 11:44 AM IST

అమానుషత్వం అంచులు దాటితే అది ఎక్కువగా దళితుల మీద, మహిళల మీద పడటం ఈ ఆధునిక యుగంలోనూ జరుగుతున్నదంటే, కలుగవలసిన పరిణామం మనిషి లోపలే కానీ బయట కాదన్న సత్యం తేటతెల్లమౌతోంది.

మహారాష్ట్రలో దళిత కుటుంబానికి చెందిన 42 ఏళ్ళ మహిళను కొట్టి, వివస్త్రను చేసి రోడ్డు మీద నడిపించి తమ పైశాచికత్వాన్ని వెళ్ళగక్కుకున్నారు. ఇది జరిగింది కూడా సాక్షాత్తూ మహరాష్ట్ర ముఖ్యమంత్రి పృధ్వీరాజ్ చౌహాన్ స్వగ్రామమైన కరద్ లో ములుగావ్ గ్రామంలో. ఆ పని చేసిన ఐదుగురు వ్యక్తులూ అగ్ర కులానికి చెందినవారే కానీ పురుషులు కారు.

కారణమేదైనా కావొచ్చు. ఎంతటి ఘోరానికి ఒడిగట్టే వారికైనా వారి కారణాలు వారికుంటాయి. ఈ అమానుషత్వానికి బలైన మహిళ కుమారుడు ఆ అగ్రవర్ణానికి చెందిన రాకుమారితో పలాయనం చిత్తగించాడు. ఇది జరిగి నెలైంది. కానీ పగ మాత్రం అంతరించలేదు. దానితో వారు రగులుతున్న పగను చల్లార్చుకోవటమే కాకుండా ఇలాంటి సాహసానికి ఒడిగట్ట్ ధైర్యం మరొకరు పూనుకోకుండా ఉండటం కోసం వారంతా కలిసి కిందపడేసి, వివస్త్రను చేసి చెప్పులతోనూ కర్రలతోనూ మోది బయటకు ఈడ్చుకుని వచ్చారని ఆ దళిత మహిళ పోలీస్ స్టేషన్ లో ఆమె ఫిర్యాదుని తీసుకోవటానికి నిరాకరించారు. ఇలాంటి సంఘటనలు జరుగుతూనేవున్నాయని బాధితురాలు టివి ఛానెల్ లో మాట్లాడిన మీదట, దళిత సంఘనేతల సాయంతో ఆందోళన కొనసాగించిన మీదట పోలీసులు స్పందించి, ఆ పారిపోయిన అమ్మాయి తల్లిదండ్రులు, ఆ ఘటనలో పాల్గొన్నవారిని అరెస్ట్ చేసారు. హోంమంత్రి కూడా ఈ విషయాన్ని సీరియస్ గా తీసుకుని నిందితులను ఎట్టి పరిస్థితుల్లోనూ వదిలిపెట్టవచ్దని ఆదేశాలిచ్చానని మీడియా ప్రతినిధులతో చెప్పారు.  

-శ్రీజ