Posted: 01/09/2012 12:10 PM IST

బెంగళూరులో జరిగిన భగవద్గీత అభ్యస్ కార్యక్రమంలో మాట్లాడుతూ, కర్నాటక ముఖమంత్రి సదానంద గౌడ భగవద్గీతను పాఠ్యాంశంగా ప్రవేశపెట్టాలన్న తన అభిమతాన్ని వెలిబుచ్చారు.

సందర్భానుసారంగా ఆ మాటలు మాట్లాడినా, ఇన్నాళ్ళకి ఒక మంచి ప్రతిపాదన తెరమీదికి వచ్చిందని చెప్పుకోవచ్చు. ఎక్కడో రష్యాలో ఎవరో మన గ్రంధాన్ని, దాన్ని కూడా ఇస్కాన్ సంస్థాపకుడు స్వామి ప్రభుదేవా రచించిన వ్యాఖ్యలకు రష్యన్ అనువాదరూపాన్ని తిరస్కరించారని వేదన చెందినవారిలో దాన్ని ఎంతవరకు ఆచరిస్తున్నారన్నది పక్కకి పెట్టినా, ఎంతమందికి భగవద్గీతలో కనీస ప్రవేశముంది, ఎంతవరకు అవగాహన చేసుకున్నారన్నది మనందరికీ బాగా తెలుసిన విషయమే. ఈ నేపథ్యంలో పాఠశాల నుంచే భగవద్గీతను పాఠ్యాంశంగా చేస్తే మనమైనా ఆ పవిత్ర గ్రంథానికి గౌరవమిచ్చినవారిమౌతాం. పెద్దలు చెప్పేది వినకుండా, వారిని లెక్కచెయ్యకుండా పెద్దలను గౌరవిస్తాం. మా పెద్దలు మాకు ఆరాధ్యదేవతలు, ఎవరైనా వారిని అగౌరవంగా చూస్తే సహించం అనటం ఎంత అర్థరహితమౌతుందో, అలాగే మనదేశంలోనే భగవద్గీత సారాన్ని తెలుసుకునే ప్రయత్నం చెయ్యకుండా దాన్ని ఇతర దేశస్తులు గౌరవించాలని కోరుకోవటం కూడా అదే కోవకు చెందుతుంది.

అయితే, విక్కమార్కుని సింహాసనానికో ప్రత్యేకతను చెప్తారు. దాని మీద కూర్చున్నంత సేపూ న్యాయబద్ధంగా ప్రవర్తించటం, సత్యమే పలకటం లాంటివి చేస్తారట ఎవరైనా. అలాగే, భగవద్గీతమీద గంభీరోపన్యాసం విన్నప్పుడు, ఆ సభలో ఉపన్యసించమన్నప్పుడు బావోద్వేగం కలిగి ఇలాంటి వాగ్దానాలు చెయ్యటం సహజం. కానీ అంతలో తమాయించుకున్న కర్నాటక ముఖ్యమంత్రి, ఈ నిర్ణయం మీద ఎటువంటి వివాదాలూ తలెత్తకుండా, ఈ విషయంలో అందరి అభిప్రాయాలనూ తీసుకుంటానని ముక్తాయింపు గా అన్నారు.

-శ్రీజ