Posted: 01/06/2012 10:36 AM IST

తెలుగుదేశం పార్టీ అధ్యక్షుడు చంద్రబాబు నాయుడు ఈ రోజు వరంగల్ జిల్లాలో రైతు పోరుబాటలో ఉన్నారు. ఆలేరులో బాబు కాన్వోయ్ ని అడ్డగించటానికి తెరాస నేతలు ప్రయత్నించారు. తెలుగు దేశం పార్టీ కార్యకర్తలకు తెరాస కార్యకర్తలకు మధ్య తోపులాట జరిగింది. దానితో పరిస్థితి ఉద్రిక్తంగా తయారైంది. కర్రలు పట్టుకుని తిరుగుతుండగా పోలీసులు వారి మీద లాఠీ చార్జ్ చేసారు. ఆందోళనలో ఒక వాహనం దగ్ధమైంది. ఎట్టకేలకు బాబు కాన్వాయ్ ఆలేరు నుంచి ముందుకు బయలుదేరింది. జనగాం నుంచి బయలుదేరిన చంద్రబాబు కాన్వోయ్ మీద తెరాస కార్యకర్తలు రాళ్ళు రువ్వగా తెదేపా కార్యకర్తలు వాళ్ళకి రాళ్ళతో సమాధానమిచ్చారు. కొందరు మీడియా ప్రతినిధులు కూడా ఈ గొడవలో గాయపడ్డారు.

ఈరోజు పోరుబాటు కార్యక్రమంలో చంద్రబాబు జనగాం మండలం పెంబర్తి నుండి బయలుదేరి అక్కడి నుండి కొడగండ్ల మండలం లక్ష్మక్కపల్లి నుండి పాదయాత్ర చేస్తారు.   ఆ తర్వాత పాలకుర్తిలో బహిరంగ సభలో ప్రసంగిస్తారు.

తెలంగాణా ఉద్యమకారుల హెచ్చరికల దృష్ట్యా పోలీసులు భారీ బందోబస్తు ఏర్పాటు చేసారు. చంద్రబాబు పర్యటనను ప్రకటించిన దగ్గర్నుంచే తెరాస నాయకులలో స్పందన బయలుదేరింది. వచ్చే ఉప ఎన్నికల దృష్ట్యా తెలంగాణా ప్రాంతాల మీద కూడా దృష్టి పెట్టబోతున్న కాంగ్రెస్ పార్టీకి చంద్రబాబు పర్యటన ఒక పైలట్ కార్యక్రమంలా తయారై, దారి ఏర్పడి తెరాస కంచుకోట బీటలువారుతుందేమో అనే ఉద్దేశ్యంతోనే చంద్రబాబు పర్యటనకు పోలీసుల భద్రతలతోనూ అరెస్ట్ లతోనూ పరోక్షంగా మద్దతునిస్తున్నారని రాజకీయ విశ్లేషకులు భావిస్తుంటే, లేదు రెండు పార్టీలు కుమ్మక్కయ్యాయని తెరాస దుయ్యబడుతోంది. ఇంతకాలం సురక్షితంగా ఉన్న కంచుకోట దారిస్తుందేమో అనే భయం కూడా తెలంగాణా ఆందోళన కారులలో కనిపిస్తోంది.

-శ్రీజ