Posted: 12/24/2011 11:45 AM IST

తెలంగాణా కోసం ఆత్మహత్య చేసుకుంటానని శుక్రవారం తెరాస అధ్యక్షుడు కెసిఆర్ తో సవాల్ చేసిన తెలుగుదేశం తెలంగాణా ఫోరం నేత మోత్కుపల్లి నరసింహులు ఈరోజు ఉరితాడు కూడా వెంట తీసుకుని గన్ పార్క్ కి వెళ్ళారు.  అప్పట్లో చెన్నారెడ్డి చేసినట్టే కెసిఆర్ కూడా తెలంగాణా వాదాన్ని పైకి లేపి, ఆందోళనకారుల ఆత్మబలిదానాలకు కారకుడై పదవీ వ్యామోహంతో రాజకీయ లబ్ధికోసం ఉద్యమాన్ని నడిపిస్తున్నారని, ఆయన కుటుంబంలో ఎవరూ చావలేదని, చనిపోయినవారంతా అమాయక విద్యార్థులేనని, డబ్బు కోసం ఉద్యమాన్ని ఢిల్లీలో తాకట్టు పెట్టారని, విమర్శించిన మోత్కుపల్లి తెలంగాణా కోసం తానే స్వయంగా ప్రాణాలర్పించటానికి సిద్ధమని ఈ రోజు ఉదయం మరో తెదేపా నేత ఎర్రబల్లి దయాకరరావుతో కలిసి గన్ పార్క్ దగ్గరకు వచ్చారు.  అక్కడ పోలీసులుకు నేతలకు మధ్య వాగ్వివాదం జరిగింది.  పోలీసులు మోత్కుపల్లి తదితరులను అరెస్ట్ చేసి పోలీస్ స్టేషన్ కి తీసుకెళ్ళి, బహిరంగ ప్రాణత్యాగానికి తెరదించారు. 

ఇంట్లో అయితే ఆపేవారుండరని ఇలా బహిరంగంగా అందరికీ చెప్పి ఆత్మహత్యను నివారించే పరిస్థితులను కల్పించి హంగామా చెయ్యటంతో ఎటువంటి నష్టం జరగదనే అలా చేస్తున్నారంటూ ఈ హడావిడంతా తగ్గిపోయిన తర్వాత అక్కడ పోగైన వారిలో, ఏ పార్టీకి చెందినవారో తెలియదు కానీ, ఘాటుగా కొందరు విమర్శించారు. 

ఏమైనా, తన పార్టీ సభ్యులనే కాకుండా ఇతర పార్టీ సభ్యులను కూడా ప్రభావితం చేస్తూ, రాజీనామాలకు ఉసిగొల్పటమే కాకుండా ఉరితీసుకోవటానికి కూడా ప్రేరేపించిన కెసిఆర్ రాజకీయ చతురతను మెచ్చుకోకుండా ఉండరెవరూ.

-శ్రీజ