Posted: 12/07/2011 04:08 PM IST

పటిష్టమైన లోక్ పాల్ బిల్లు కోసం పదకొండో తేదీ నుంచి అన్నా హజారే దీక్ష చెయ్యటానికి సర్వ సన్నాహాలు చేసుకుంటుండగా, అదే వేదిక మీద ఒక రోజు ముందు పదో తేదీ నుంచే ఆయనకు వ్యతిరేకంగా యువతను పోగుచేసి కార్యక్రమాలను నిర్వహించటానికి రాజు పరులేకర్ పూనుకుంటున్నారు. రాజు పరులేకర్ ఒకప్పుడు అన్నా హజారే బ్లాగ్ ను అధికారికంగా నిర్వహించినవారు. అన్నా బృందంలోని కిరణ్ బేడీ, కేజ్రీవాల్ లతో పొసగని వరులేకర్, అన్నా దీక్ష చెయ్యదలచుకున్న జందర్ మంతర్ నుంచే ఆయనకు వ్యతిరేకంగా కార్యక్రమాలను నిర్వహించటమే కాకుండా, కిరణ్ బేడీ కోర్ కమిటీలో కొనసాగటం మీద, కేజ్రీవాల్ వ్యవహారం మీద అన్నాను నిలదీయనున్నారు. ఈ నెల 23 వ తేదీన చెయ్యదలచుకున్న అన్నా సభ్యుల ఇళ్ళ ముట్టడిలో స్వయంగా పాల్గొంటానని రాజు పరులేకర్ అన్నారు.

అన్నా హజారే తరఫున బ్లాగ్ లను నిర్వహించిన రాజు పరులేకర్ అన్నా బృందం మీద ఎన్నో ఆరోపణలు చేసారు. ముంబైవాసియైన జర్నలిస్ట్ రాజు పరులేకర్ అన్నా సంతకం లేని ఒక బ్లాగ్ ప్రకటనలో, అన్నా తన కోర్ కమిటీ సభ్యత్వాలను పునపరిశీలించి కమిటీని పునర్నిర్మించాలని కోరుతున్నట్టుగా రాసారు. దానిమీద జరిగిన వివాదం దృష్ట్యా అన్నా ఆ బ్లాగ్ ను మూసివేసి ఇద్దరు కొత్త సాంకేతిక నిపుణుల ఆధ్వర్యంలో నిర్వహించటానికి మరో కొత్త బ్లాగ్ ను ప్రారంభించాలని అనుకున్నారు. దానితో పరులేకర్ కొన్ని రోజులుగా మీడియాలో అన్నా బృందం గురించి విమర్శలు చేస్తున్నారు.

-శ్రీజ