Posted: 11/30/2011 12:28 PM IST

దేవాలయాల పట్ల ప్రభుత్వ అలక్ష్యం ఎక్కువౌతోందని విమర్శలు ఎక్కువౌతున్నాయి.  పురాతన శిథిలమౌతున్న దేవాలయాలను పట్టించుకునే నాథులైతే లేరు.  కనీసం జనాదరణ కలిగిన, భక్తులు అత్యంత భక్తి శ్రద్ధలతో సందర్శించే దేవాలయాల పట్లయినా శ్రద్ధ చూపించి, కూలిపోయిన గోపురాలను పునరుద్ధరించి మిగిలిన దేవాలయాలలోని గోపురాలను, కట్టడాలను పరిశీలించి వాటిని కాపాడే దిశగా ప్రభుత్వం పూనుకోవాలని పలువురు ఆశిస్తున్నారు.  వరసగా గాలిగోపురాలు కూలిపోతున్నా నిమ్మకు నీరెత్తినట్టుగా స్థబ్దుగా ఉన్న దేవాలయశాఖ మీద విమర్శలు వినిపిస్తున్నాయి.  నంద్యాల మహానంది ఆలయంలో ధ్వజస్తంభం కూలిపోయినా తాత్కాలికంగా ఏర్పాటు చేసిన వెదురు బొంగుకి కూడా మూడేళ్లు నిండాయి.  నవ నందులలో మిగిలిన నందీశ్వరాలయాల్లో కూడా ఇదే దుస్థితి పట్టబోతోంది.  వినాయక నందీశ్వరుడి ఆలయంలోని ధ్వజస్తంభం కూడా శిథిలావస్తకు వచ్చి కూలిపోవటానికి సిద్ధంగా ఉన్నా పట్టించుకోకపోవటం దురదృష్టమని, దేవాలయంలో ధ్వజస్తంభం లేకపోవటం అరిష్టమని భక్తులు ఆవేదన చెందుతున్నారు.

దేవాలయ నిర్మాణంలో ప్రతిదానికీ ఒక ప్రాముఖ్యముంది.  అది రాజగోపురమే కానీ, మిగిలిన గాలి గోపురాలే కానీ లేదా గర్భగుడి, దానిమీద కలశాలు, ప్రాకారాలు అన్నిటికీ విశిష్టత ఉంటుంది.  అన్నీ కలిపితేనే దేవాలయమవుతుంది.  దేవాలయ వ్యవస్థ భారతీయ సంస్కృతిలో విడదీయలేని భాగం.  వీటి నిర్మాణం, నిర్వహణల బాధ్యతలను పూర్వకాలంలో పాలించే రాజులు చేపట్టేవారు.  ఈనాటి పాలకులకు కొత్త నిర్మాణాల జోలికి పోకపోవటం వలనే భక్తులకు ఆలయాలు సరిపోకుండా ఉన్నాయి.  నగరాలలోని రోడ్లను, రహదారులను విశాలంగా చేసే పని చేపట్టినట్టే, దేవాలాయ పునరుద్ధరణలు, కొత్త నిర్మాణాలు కూడా ప్రభుత్వ బాధ్యతే.  ఆలయాల్లో ఆర్జన కూడా ఎక్కువవుతున్నా పట్టించుకోకపోవటం చాలా అన్యాయమని భక్తులు బాధపడుతున్నారు. 

శ్రీజ