Posted: 04/11/2011 01:24 PM IST

రాజ్యసభ సభ్యుడు టి.సుబ్బరామిరెడ్డి ఆధ్వర్యంలో ప్రముఖ సినీ నటుడు మోహన్ బాబుకు సన్మానం జరిగిన సందర్భంలో మెగాస్టార్ చిరంజీవి, మోహన్ బాబులు ఒకరిని ఒకరు బాగా పొగుడుకున్నారు. చిరంజీవి ముందుగా మాట్లాడుతూ "మోహన్ బాబు, నేను టామ్ అండ్ జెర్రి కారెక్టర్ల వంటివారం. మేమిద్దరం పలకరించుకోమని అనుకుంటారు. మీడియా దృష్టిలో మా మధ్య తగాదా ఉంది. మా మద్య అగ్గిపుల్ల గీయడానికి ప్రయత్నించేవారు ఉన్నారు. దానిని ఎన్ కేష్ చేసుకోవాలని కొందరు చూస్తారు. మేమిద్దరం అలాంటివారికి అవకాశం ఇవ్వరాదు.ఎలాంటి క్రైసిస్ వచ్చినా ముందుగా మేమే రియాక్ట్ అవుతాం.మాది ముప్పై ఏళ్ల అనుబంధం, ఒకరికొకరం పెనవేసుకుని పోయిన జీవితాలు మావి. ఎవరివైపు తప్పు జరిగినా రెండోవారం సర్దుకుంటాం. ఒక రకంగా చెప్పాలంటే దాంపత్య జీవితంలాగానే సాగుతుంది. మోహన్ బాబు మంచి స్నేహితుడు. అలాంటి వ్యక్తి దొరకడం అదృష్టం 'అని అన్నారు. ఆ తర్వాత మోహన్ బాబు సమాధానం ఇస్తూ, ఎవరు అగ్గిపుల్ల గీసినా అది వారికే అంటుకుంటుందని వ్యాఖ్యానించారు.అంతేకాక మోహన్ బాబు కొత్త ఆకాంక్షను వ్యక్తం చేశారు. అదేమిటంటే, చిరంజీవి రాజకీయాలలోకి వెళ్లి ఏదో సాధించాలని అనుకున్నారు. తద్వారా ప్రజాసేవ చేయాలని ఆశిస్తున్నారు. ఆయన ఆకాంక్ష నెరవేరాలని, ఆ సంకల్సం నెరవేరాలని భగవంతుడిని కోరుకుంటున్నానని, మనసా,వాచా ఈ విషయం చెబుతున్నానని అన్నారు.గతంలో సినీ వజ్రోత్సవాలలో చిరంజీవి, మోహన్ బాబుల మధ్య మాటల వాగ్భాణాలు నడిచిన సంగతి తెలిసిందే. అప్పటినుంచి వీరిద్దరి మద్య సంబందాలు అంతంతమాత్రంగానే ఉంటున్నాయి. అయితే గత కొద్దికాలంగా వీరి మధ్య సంబంధాలు కాస్త మెరుగుపడుతున్నాయి. ఆ తర్వాత మరో సినీనటుడు రాజేంద్ర ప్రసాద్ తనకు జరిగిన సన్మానానికి సమాధానంగా మాట్లాడుతూ, నటుడికి మార్కెటింగ్ తెలిసి ఉండాలనే విషయం అర్ధం అయిందని చమత్కరించారు.