సత్యవాణి మాటలు- శ్రీచైతన్య విద్యార్థి ఆత్మహత్య

Posted: 09/13/2013 07:25 PM IST

రాష్ట్ర విభజనకు వ్యతిరేకంగా సమైక్యాంధ్ర ఐకాస ఆధ్వర్యంలో విజయవాడలోని స్వరజ్ మైదానంలో మహిళా గర్జన సభను నిర్వహించారు. ఈ కార్యక్రమంలో పాల్గొన్న సత్యవాణి మాట్లాడుతూ.. కేంద్రం విభజన నిర్ణయాన్ని వెనక్కు తీసుకోవాలని డిమాండ్ చేశారు. రాష్ట్రాన్ని ముక్కలు చేయొద్దంటూ ఆమె ఈసందర్భంగా విజ్ఞప్తి చేశారు. ఆంధ్ర ప్రదేశ్ లో పుట్టడాన్ని రాష్ట్ర ప్రజలంతా ఎంతో గర్వంగా చెప్పుకుంటారని తెలిపారు. తెలుగు ప్రజల్లో ఎంతో ఉత్తేజం, చైతన్యం ఉంటుందన్నారు. విభజన తెగులును తెలుగువారే అంతమొందించగలరని పేర్కొన్నారు. ప్రస్తుతం హైదరాబాద్ ను దోచుకోవడానికే నేతలు పరిపాలన కొనసాగిస్తున్నట్లు ఉందని ఎద్దేవా చేశారు.

 

శ్రీచైతన్య విద్యార్థి ఆత్మహత్య

జిల్లాలోని విజయవాడలోని గొల్లపూడి శ్రీచైతన్య కాలేజీకి చెందిన ఓ విద్యార్థి ఆత్మహత్య నగరంలో కలకలం రేపింది. తెనాలిలోని సంజీవ్‌నగర్‌కు చెందిన ఈశ్వర్ ఈ అఘాయిత్యానికి పాల్పడ్డాడు. హాస్టల్‌ గదిలోని బాత్రూంలో టవల్‌తో ఉరేసుకుని మృతిచెందాడు. అనారోగ్య సమస్యల వల్లే ఈశ్వర్ ఆత్మహత్యకు పాల్పడ్డట్టు తెలస్తోంది. విజయవాడ గొల్లపూడి శ్రీచైతన్య కాలేజీలో ఈశ్వర్ ఇంటర్మీడియట్ ఫస్టియర్ చదువుతున్నాడు. ఆరోగ్యం బాగాలేదని ఉదయం కళాశాల ఇన్ ఛార్జీకి ఫిర్యాదు చేశాడు. అదే రోజు సాయంత్రం హాస్టల్ గదిలో ఉన్న బాత్రూంలోని పైపుకు టవల్‌తో ఉరివేసుకొని ఆత్మహత్య చేసుకున్నాడు. మరునాడు హస్టల్‌లోని బాత్రూంల్లో నీళ్లు రాకపోవడంతో విద్యార్థులు హాస్టల్ వార్డెన్‌కు తెలిపారు. అందరూ కలిసి నీళ్ల పైపులను పరిశీలించారు. అదే సమయంలో అక్కడ ఈశ్వర్ మృతదేహాన్ని చూశారు. విషయం తెలసుకున్న కళాశాల యజమాన్యం పోలీసులకు సమాచారం అందించారు. పోలీసులు పోస్టుమార్టం కోసం మృతదేహాన్ని ప్రభుత్వాసుపత్రికి తరలించారు. ఈ ఘటనపై పోలీసులు కేసు నమోదు చేసుకుని దర్యాప్తు చేపట్టారు.