ప్రజల వద్దకు లగడపాటి.. దేవినేని హెచ్చరిక..

Posted: 08/23/2013 06:07 PM IST

సమైక్యాంధ్రా ఉద్యమం తీవ్రతరం అవుతున్న నేపథ్యంలో తాము కూడా ప్రజల్లోకి వెళతామని విజయవాడ ఎంపీ లగడపాటి రాజగోపాల్ తెలిపారు. కాంగ్రెస్ వర్కింగ్ కమిటీ ఏర్పాటు చేసిన ఆంటోని కమిటీపై తనకు అభ్యంతరం లేదన్నారు. ఇకనుంచి ప్రజల్లోకి వెళ్లి ఉద్యమం చేస్తామన్నారు. యూపీఏ సర్కారు విభజన ప్రక్రియను నిలిపివేసి చర్చలు జరపాలని లగడపాటి డిమాండ్ చేశారు. ఎంపీల సస్పెన్షన్ పార్టీల నిర్ణయం కాదని..అది పార్లమెంట్ నిర్ణయమన్నారు. సీమాంధ్రలో ఉద్యమం తీవ్రతరం అవుతున్న నేపథ్యంలో రాజకీయ నేతలు ప్రజల్లోకి వెళ్లి వారితో అడుగువేయాడానికి యత్నాలు ఆరంభించారు. సమైక్య నినాదంతో సీమాంధ్ర జిల్లాలో నిరసన గళం ఊపందుకుంది.

 

రాజీనామా చేయలేదేం..

మంత్రి పార్థసారధి వెంటనే రాజీనామా చేసి ప్రజా ఉద్యమంలో పాల్గొనాలని తెలుగుదేశం పార్టీ రాష్ట్ర కార్యదర్శి గొట్టిపాటి రామక్రిష్ణ ప్రసాద్ డిమాండ్ చేశారు. తెదేపా జిల్లా కార్యాలయంలో మాట్లాడుతూ సోనియాగాంధీకి భయపడే ఎంపీ లగడపాటి రాజగాపాల్ నగరానికి రావడంలేదని పేర్కొన్నారు. తాను రాజీనామా చేస్తానని ఎన్జీవోలతో చెప్పిన సారథి మాటతప్పారని, కాంగ్రెస్ పార్టీ నాయకులు మంత్రితో రాజీనామా చేయించాలని డిమాండ్ చేశారు.

 

దేవినేని అవినాస్ హెచ్చరిక..

నగరంలో సమైక్యాంధ్ర ఉద్యమం ఉవ్వెత్తున ఎగిసిపడుతోంది. సీమాంధ్ర స్టూడెంట్స్ జేఏసీ నేత దేవినేని అవినాష్ ఆధ్వర్యంలో విద్యార్థులు కదం తొక్కారు. ఈరోజు ఎక్జిక్యూటివ్ సర్కిల్ నుంచి బెంజ్‌సర్కిల్ వరకు విద్యార్థులు భారీ ర్యాలీ నిర్వహించారు. కేంద్రం విభజన నిర్ణయాన్ని వెనక్కి తీసుకోకపోతే ఉద్యమాన్ని ఉదృతం చేస్తామని వారు హెచ్చరించారు.