Posted: 02/22/2013 01:09 PM IST

పట్టభద్రుల నియోజకవర్గానికి జరిగిన ఎన్నిక పట్ల ఓటర్లు అనాసక్తి ప్రదర్శించారు. కృష్ణా, గుంటూరు జిల్లాల్లోని అన్ని పోలింగ్ కేంద్రాలలో ఇదే పరిస్థితి ఉంది. 2,19,000 ఓటర్లకుగాను కేవలం 1,00,070 మంది ఓటర్లు మాత్రమే తమ ఓటు హక్కు వినియోగించుకోవడంతో ఫలితం సందిగ్ధంగా మారింది. తెలుగుదేశం పార్టీ అభిమానులు తమ అభ్యర్థి చిగురుపాటి వరప్రసాద్ మెజారిటీ తగ్గినా గెలుపు ఖాయమని ధీమా వ్యక్తం చేస్తున్నారు. పోలింగ్ సరళిని బట్టి కృష్ణాజిల్లాలో చిగురుపాటికి సీపీఎం బలపరిచిన బొడ్డు నాగేశ్వరరావు గట్టిపోటీ ఇచ్చారని తెలుస్తోంది. ఉపాధ్యాయ వర్గాల నుంచి నాగేశ్వరరావుకు ఎక్కువగా ఓట్లు పడ్డాయి.  పట్టణాలతో పోలిస్తే గ్రామీణ ప్రాంతాలు ఎక్కువగా ఉన్న డివిజన్లలో ఓటింగ్ శాతం మెరుగ్గా ఉంది. నూజివీడు డివిజన్‌లో అత్యధికంగా 54.59 శాతం నమోదు కాగా, అత్యల్ప ఓటింగ్ విజయవాడలో నమోదు అయింది. ఎమ్మెల్సీ ఎన్నికలలో ఎవరు గెలిస్తే ఏమిటిలే అన్న భావనతో ఓటర్లు పోలింగ్‌కు దూరంగా ఉన్నట్టు కనిపిస్తోంది.

సిట్టింగ్ అభ్యర్థి అయిన చిగురుపాటి అభిమానులు గత ఎన్నికలలో పనిచేసినంత హుషారుగా ఈసారి చేయలేదు. ఆ ఎన్నికలలో దాదాపు ప్రతి ఓటరును వ్యక్తిగతంగానో, ఫోన్ మెసేజ్ రూపంలోనో పలకరించి ఓట్ల కోసం అభ్యర్థించారు.గెలుపు మనకేనన్న ధీమాతోనో, మరో కారణంవల్లనో ఉదాసీనంగా పనిచేశారు. గత ఎన్నికలలో కనబడిన అంకితభావం, పట్టుదల ఈసారి వారి ప్రచారంలో లేవు. టీడీపీ అభిమానులలో చాలామంది ఓటింగ్‌కు వెళ్ళపోకవడానికి ఇదొక కారణం. బొడ్డు నాగేశ్వరరావు గెలుపు కోసం సీపీఎం అనుబంధ సంస్థలు, ఉపాధ్యాయ సంఘాలు చాపకింద నీరులా పనిచేశాయి. దీంతో గెలుపు ఓటములపై స్పష్టత కనిపించడం లేదు. పోలింగ్ శాతం తగ్గడంతో రాజకీయ పరిశీలకులు కూడా ఖచ్చితమైన అంచనాలకు రాలేకపోతున్నారు. మొత్తం 19 మంది అభ్యర్థులు రేస్‌లో ఉన్నప్పటికీ పోటీ ఇద్దరి మధ్యే అన్నది సుస్పష్టం. గత ఎన్నికలలో చిగురుపాటి, డాక్టర్ సమరంపై పెద్ద తేడాతో గెలిచారు. ఈసారి వామపక్షాలు, బీజేపీ రంగంలో ఉండడంతో ఫలితం ఎలా ఉండబోతోందన్నది ఎవరూ చెప్పలేకపోతున్నారు.