Posted: 12/05/2012 11:59 AM IST

             విజయవాడ దుర్గాపురంలోని ఘంటసాల వెంకటేశ్వరరావు ప్రభుత్వ సంగీత నృత్య కళాశాల ఆవరణలో గంధర్వ గాయకుడు ఘంటసాల విగ్రహాన్ని బహు భాషా గాయకుడు పిబి శ్రీనివాస్ ఆవిష్కరించారు. ఘంటసాల కుమార్తె మద్దూరి శ్యామల జ్యోతి ప్రజ్వలనతో సభ ప్రారంభమైంది. విశిష్ట అతిథిగా పాల్గొన్న ప్రముఖ సినీ దర్శకులు విశ్వనాథ్ మాట్లాడుతూ రవీంద్రుని విగ్రహంతో నెలకొని వున్న శాంతినికేతన్‌ లా,  ఘంటసాల పేరుతో ఉన్న ఈ కళాశాల ప్రాంగణం ప్రశాంతతకు నిలయంగా ఉందని, తంబూర వాయిస్తున్న ఘంటసాల విగ్రహం ఎంతో నిండుదనాన్ని తెచ్చిందన్నారు. అంతేకాదు, దేవాలయ నిర్మాణం తర్వాత దేవతామూర్తుల విగ్రహ ప్రతిష్ట ఎంతటి శోభ సమకూర్చుతుందో సంగీత కళాశాలలో ఘంటసాల విగ్రహం తర్వాత అంతటి వెలుగొచ్చిందని ప్రముఖ సినీ దర్శకులు కాశీనాధుని విశ్వనాథ్ అన్నారు.

       విగ్రహావిష్కర్త పీబీ శ్రీనివాస్ మాట్లాడుతూ అశేష ప్రజానీకాన్ని ఆకర్షించిన చిత్రాలను నిర్మించిన విశ్వనాథ్ దర్శకత్వంలో తాను పాడలేకపోయాననే బాధ చెల్లెలి కాపురం చిత్రంతో తీరిందన్నారు. ‘భలే మంచిరోజు’ పాట ఈ సందర్భానికి సరిగ్గా వర్తిస్తుందని అన్నారు. ఘంటసాల విగ్రహ ప్రదాత, ప్రముఖ పారిశ్రామికవేత్త కోగంటి సత్యనారాయణ స్వాగత వచనాలు పలికారు.
        విగ్రహావిష్కరణకు మంత్రి కొలుసు పార్థసారథి హాజరయ్యారు. ఎమ్మెల్యేలు మల్లాది విష్ణు, వెలంపల్లి శ్రీనివాస్, ఎమ్మెల్సీ ఐలాపురం వెంకయ్య, ప్రముఖ పారిశ్రామికవేత్త గోకరాజు గంగరాజు, సంగీత కళాశాల ప్రిన్సిపల్ కేఎస్ గోవిందరాజన్, ట్రేడ్ యూనియన్ నాయకులు జనక్‌ప్రసాద్ తదితరులు పాల్గొనగా, పద్మశ్రీ తుర్లపాటి కుటుంబరావు సభాధ్యక్షత వహించారు. కార్యక్రమాన్ని సుమధుర కళానికేతన్ వారు నిర్వహించారు.
          ఇక,  ఘంటసాల వెంకటేశ్వరరావు 90వ జయంతి సందర్భంగా జరిగిన రాష్ట్రస్థాయి ఘంటసాల పాటల పోటీల్లో విజేతలుగా కే విష్ణుప్రియ (ప్రథమ), కె పాత్రో (ద్వితీయ), షణ్ముఖి (తృతీయ) బహుమతిని పొందగా, పది కన్సొలేషన్ బహుమతులను కే విశ్వనాథ్ చేతులమీదుగా అందించారు.

...avnk