పాండిచ్చేరి మంత్రికి సమైక్య సెగ- భూమన కరుణాకర్ రెడ్డి ఫైర్

Posted: 09/19/2013 03:40 PM IST

సీమాంధ్రలోని ఆరుకోట్ల మంది ప్రజలతో కాంగ్రెస్ పార్టీ ఆడుకుంటోందని వైఎస్ఆర్ కాంగ్రెస్ పార్టీ తిరుపతి ఎమ్మెల్యే భూమన కరుణాకర్ రెడ్డి మండిపడ్డారు. రాష్ట్ర విభజన వల్ల సీమాంధ్రలోని చేతి వృత్తుల వారు సైతం తీవ్రంగా నష్టపోవాల్సి వస్తుందని ఆవేదన వ్యక్తం చేశారు. తిరుపతిలోని తుడా సర్కిల్ లో క్రిస్టియన్ మైనార్టీల దీక్షలో భూమన ఈరోజు పాల్గొన్నారు. ఈ సందర్భంగా భూమన నడిరోడ్డుపై బుట్టలు అల్లుతూ నిరసన తెలిపారు. రాహుల్ గాంధీని ప్రధానమంత్రిని చేయటానికే సోనియాగాంధీ రాష్ట్రాన్ని విభజించాలని కుట్ర పన్నుతున్నారని విమర్శించారు. జగన్ ప్రభంజనాన్ని అడ్డుకోవడానికి చంద్రబాబునాయుడు... సోనియాగాంధీకి సహకరించారని కరుణాకర్ రెడ్డి అన్నారు.

 

పాండిచ్చేరి మంత్రికి సమైక్య సెగ

రామచంద్రాపురం మండల కేంద్రంలో అఖిలపక్ష నాయకులు నిర్వహిస్తున్న సమైక్యాంద్ర ఆందోళనలో రహదారులపై వాహనాలు నిలిచిపోయాయి. ఈ నేపథ్యంలో పాండిచ్చేరి విద్యుత్తుశాఖ మంత్రి త్యాగరాజన్ తిరుపతికి వెళ్తుండగా ట్రాఫిక్ లో చిక్కుకున్నారు. దీంతో ఉద్యమ నాయకులు విద్యుత్తు శాఖ మంత్రి వాహనాన్ని అడ్డుకుని ఆయన చేత సమైక్యాంద్ర నినాదాలు పలికించారు. ఈ కార్యక్రమంలో అఖిలపక్ష నాయకులు వేణుగోపాల్ నాయుడు, హరిప్రసాద్ నాయుడు, నరసింహారెడ్డి , బాబు నాయుడు , తదితరులు ఉన్నారు.