మధుమేహానికి చెక్ పెట్టే హెల్తీ ఆహారం

Posted: 05/08/2015 03:56 PM IST

మధుమేహం వ్యాధితో బాధపడేవారికి ఇంకా మరెన్నో ఇబ్బందులు తప్పవు. ఆ వ్యాధిగ్రస్తులు ఎన్నో జాగ్రత్తలు పాటించడంతోపాటు నిత్యం ఆరోగ్యకరమైన ఆహారాన్నే సేవించాలని వైద్యులు సలహాలు ఇస్తుంటారు. అంతేకాదు.. వ్యాయామం కూడా ఎంతో అవసరం. సమయానికి ఆహారం తీసుకోవడంతోపాటు పోషకాలు నిండిన డైట్‌ను అనుసరించాలని ఆరోగ్య నిపుణులు అంటున్నారు. మధుమేహానికి ఆకలి, నోరు ఎండిపోవడం, అలసట, చేతులు, కాళ్ల నొప్పులు వంటివి లక్షణాలు. ఇంకా కంటిచూపు మందగించడం, శరీర బరువు పెరగడం, తగ్గడం వంటి లక్షణాలు కనిపిస్తాయి. కోపం, మానసిక ఒత్తిడి, చిన్న గాయాలు కూడా మానిపోకుండా చాలారోజులకు అలానే ఉండిపోతాయి.

అయితే సరైన ఆహారాన్ని తీసుకోవడం ద్వారా మధుమేహాన్ని నియంత్రించవచ్చునని ఆరోగ్య నిపుణులు అంటున్నారు. మధుమేహగ్రస్థులు అరటిపూవు, అరటికాడ, క్యాబేజీ, లేత వంకాయలు, బెండ కాయలు, మునగాకు, పొట్లకాయ, దొండకాయ, లేత బీరకాయలు, లేత చిక్కుడు కాయల్ని తీసుకోవచ్చు. అలాగే ఆకుకూరల్లో పొన్నగంటి, తోటకూర, మెంతికూర, కొత్తిమీర వంటివి తీసుకోవచ్చు. మధుమేహ వ్యాధిగ్రస్థులు రోజుకో ఆకుకూర తీసుకోవాలి. ఆకుకూరల్ని కూరగానో లేదా సూప్‌లా తీసుకోవచ్చు. ఆకుకూరల తరుగుతోపాటు కాస్త మిరియాలు, జీలకర్ర, వెల్లుల్లి, ఉల్లి, కాసింత పసుపు చేర్చి రెండు గ్లాసుల నీటిలో మరిగించి సూప్‌లా తీసుకోవడం మంతో మేలు చేస్తుంది.

అయితే.. మధుమేహం వ్యాధితో బాధపడేవారు చక్కెర, గ్లూకోజ్, స్వీట్స్, కేక్, చాక్లెట్, ఐస్ క్రీమ్, బెల్లం, బంగాళాదుంప, మామిడి, అరటి పండు, సపోటా, కూల్ డ్రింక్స్ వంటివి ఎప్పటికీ తీసుకోకూడదు. క్యారట్, బీట్ రూట్ నెలకోసారి లేదా రెండుసార్లు తీసుకోవచ్చు. మధుమేహ లక్షణాలుంటేనే వాకింగ్ అలవాటు చేసుకోవడం మంచిదని న్యూట్రీషన్లు సలహా ఇస్తున్నారు. ఈ విధంగా నిపుణులు ఇచ్చిన ఆరోగ్య సలహాలు తూ.చ. తప్పకుండా పాటిస్తే.. ఆ వ్యాధిని చెక్ పెట్టవచ్చు.