మీ పిల్లలకు ఆర్థిక గురువులు మీరే

Posted: 12/13/2013 03:56 PM IST

పొదుపు అనేది ఒక స్వభావం. దాన్ని బాల్యం నుంచే పిల్లలకు అలవాటు చేయాలి. ఫైనాన్సియల్ ప్లానింగ్‌ను తల్లిదండ్రులే నేర్పించాలి. డబ్బుకున్న విలువను పిల్లలు గుర్తించినప్పుడే శ్రమ విలువ తెలుస్తుంది. శ్రమను గౌరవించడమంటే మనుషుల్ని గౌరవించడం అన్న మాట'' అంటున్నారు ప్రపంచ కుబేరుల్లో ఒకరైన ఇన్వెస్ట్‌మెంట్ గురు వారెన్‌బఫెట్. చిన్నపిల్లల్లో పొదుపును ఒక హాబిట్‌గా చేయాలనేది ఆయన ఆలోచన. ఇందుకు ఏం చేయాలంటే- వీలున్నప్పుడు మీ పిల్లలకు ఒక చిన్న పిగ్గీబాక్స్‌ను కొనిపెట్టండి.

అప్పుడప్పుడు మీరిచ్చే పాకెట్‌మనీలో కొంత మొత్తాన్ని ఆ పిగ్గీబాక్స్‌లో దాచుకోమనండి. పదిరూపాయలు దాచుకుంటే దానికి మరో పది జత చేస్తామని హామీ ఇవ్వండి. నెలకో, రెన్నెళ్లకో పిగ్గీబాక్స్ నిండిపోయాక.. అందులోని సొమ్మును స్వయంగా పిల్లలతోనే లెక్కవేయిస్తే మంచిది. కుటుంబసభ్యులందరి మధ్య పిల్లల్ని కూర్చోబెట్టుకుని ఈ పని చేస్తే బాగుంటుంది. వీలైతే - పిల్లలు డబ్బును లెక్కపెట్టే దృశ్యాలను వీడియో తీసి.. చిన్న సెలబ్రేషన్ వాతావరణాన్ని సృష్టిస్తే మరీ మంచిది.

రూపాయి రూపాయి కూడబెడితే ఎంత పెద్ద మొత్తం అవుతుందో వారికి చెప్పడానికే ఇదంతా. క్రమశిక్షణతో పొదుపు చేసినందుకు ఇంటిల్లిపాదీ అభినందించండి. మరొక రోజు పిల్లల్ని తీసుకుని కుటుంబంతో సహా బ్యాంకుకు వెళ్లండి. అక్కడ పిల్లల పేరుతోనే ఒక చిన్న ఖాతా తెరిచి.. పిగ్గీబాక్స్‌లో దాచుకున్న మొత్తాన్ని బ్యాంకు ఖాతాలో జమ చేయండి. ఆ మొత్తానికి మీరు కూడా మరికొంత మొత్తం కలిపితే.. కాంప్లిమెంటరీ అందుకుంటున్నట్లు పిల్లలు ఆనందిస్తారు.

పిల్లల పేరున తీసిన బ్యాంకు ఖాతాలో జమ చేసిన సొమ్మును చూశాక.. వారిలో ఆర్థిక ఆత్మవిశ్వాసం మొగ్గతొడుగుతుంది. జీవితాంతం ఇదొక తీపిగుర్తుగా, తల్లిదండ్రులు నేర్పిన పొదుపు పాఠంగా తప్పక గుర్తుండిపోతుంది. ఆ తర్వాత పొదుపు సర్టిఫికెట్లు, ఫిక్స్‌డ్ డిపాజిట్లు, మ్యూచువల్‌ఫండ్లు, ఇన్స్యూరెన్స్.. వంటి అంశాలన్నీ వివరిస్తే మరింత చైతన్యం వస్తుంది.