‘అది నాన్నగారు వారసత్వంగా ఇచ్చారు’

Posted: 04/10/2015 12:49 PM IST

Nandamuri balakrishna lion movie audio release function speech senior ntr style

సీనియర్ ఎన్టీఆర్ వారసత్వంతో ఇండస్ట్రీలోకి ఎంట్రీ ఇచ్చిన నందమూరి బాలకృష్ణ.. ప్రస్తుతం సీనియర్ హీరోల్లో టాప్ స్థానంలో దూసుకుపోతున్నారు. ‘సింహా’ సినిమాలో సరికొత్త డైలాగ్ డెలివరీతో ప్రేక్షకులకు తన చరిష్మా ప్రదర్శించిన బాలయ్య.. ‘లెజెండ్’ సినిమాతో 50 కోట్ల క్లబ్ లోకి చేరి రికార్డు సృష్టించారు. ఐదుపదుల వయస్సుకు దగ్గరపడుతున్నప్పటికీ నేటి యువహీరోలకు ధీటుగానే కొత్త స్టైలిష్ లుక్స్ తో కనువిందు చేస్తున్నారు. అయితే.. ఈ కొత్తదనాన్ని తనకు ప్రసాదించింది తన తండ్రి ఎన్టీఆర్ అని, ఆయనిచ్చిన ఆ వరంవల్లే తాను నటించే సినిమాలన్నింటిలో కొత్తదనం వుంటుందని తాజాగా ఆయన చెప్పిన స్పీచ్ అందరినీ ఆకర్షించింది.

ప్రస్తుతం బాలకృష్ణ హీరోగా కొత్త దర్శకుడు సత్యదేవా దర్శకత్వంలో ‘లయన్’ చిత్రం తెరకెక్కుతున్న విషయం తెలిసిందే! త్రిష, రాధికా ఆప్టే హీరోయిన్లుగా నటిస్తున్న ఈ సినిమాను ఎస్.ఎల్.వి సినిమా పతాకంపై రుద్రపాటి రమణారావు నిర్మించారు. ఇక ఈ చిత్రానికి మ్యూజిక్ డైరెక్టర్ మణిశర్మ పాటలు అందించారు. ఈ చిత్ర ఆడియో విడుదల కార్యక్రమం ఏప్రిల్ 9న శిల్పకళావేదికలో ఘనంగా జరిగింది. మణిశర్మ సంగీతం అందించిన ఈ చిత్ర ఆడియో సీడీని ఏపీ సీఎం చంద్రబాబు విడుదల చేసారు. ఈ వేడుకలో బాబుతోపాటు పలువురు సినీ, రాజకీయ ప్రముఖులు పాల్గొన్నారు. ఈ సందర్భంగానే బాలయ్య తన స్టైల్ డైలాగులతో, మ్యానరిజంతో ఇచ్చిన స్పీచ్ అభిమానులను ఉర్రూతలూగించింది. భారీ డైలాగులు, మధ్యమధ్యలో తెలుగు పద్యాలు, చలోక్తులు విసిరి ఆద్యాంతం స్పీచ్‌ను రక్తికట్టించారు.

ఈ క్రమంలోనే బాలయ్య మాట్లాడుతూ.. “మీరు ప్రతిసారీ కొత్తదనమున్న సినిమాలనే ఎలా తీస్తారు? కొత్తవారిని వెండితెరకు పరిచయం చేయాలన్న ఆలోచన ఎలా వస్తుంది? అని చాలా మంది అడుగుతారు. మా నాన్న నందమూరి తారక రామారావు నాకు వారసత్వంగా ఇచ్చిందే కొత్తదనాన్ని! ఇక నా సినిమాలో కొత్తదనం లేకుండా ఎలా ఉంటుందీ?” అంటూ బాలకృష్ణ తన స్టైల్లో స్పీచ్ ఇచ్చారు. ఈ స్పీచ్ విన్న అనంతరం అక్కడున్న అభిమానులు ఒక్కసారిగా కేకలు వేస్తూ తమ అభిమానాన్ని చాటుకున్నారు. ఇదిలావుండగా.. ఏప్రిల్ 30న ఈ సినిమా భారీ ఎత్తున విడుదల కానుంది.