వరుణ్ తేజ్

Posted: 04/03/2015 03:57 PM IST

Varun tej latest movie kanche updates pragya jaiswal

మెగాఫ్యామిలీ నుంచి వచ్చిన డైనమిక్ హీరో వరుణ్ తేజ్.. తన మొదటి సినిమా ‘ముకుందా’తో టాలీవుడ్ ఎంట్రీ ఇచ్చిన విషయం తెలిసిందే! ఆ మూవీ యావరేజ్ హిట్ అయినప్పటికీ.. వరుణ్ హీరోగా మంచి మార్కులు కొట్టేశాడు! ఆ తర్వాత తన తదుపరి సినిమా కోసం ఈ హీరోకి కాస్త నిరీక్షణ చేయాల్సి వచ్చింది. నిజానికి ఈ హీరో పూరీజగన్నాథ్ దర్శకత్వంలో ఓ మూవీ చేయాల్సి వుండేది. కానీ పూరీ ప్రస్తుతం రెండుమూడు సినిమాలతో బిజీగా వుండడంతో వీరిద్దరి కాంబోలో రూపొందాల్సిన మూవీ పోస్ట్ పోన్ అయ్యింది.

ఈ నేపథ్యంలోనే వరుణ్ ఇప్పుడు తాజాగా ‘గమ్యం’, ‘వేదం’, ‘కృష్ణం వందేజగద్గురుమ్’ లాంటి విలక్షణ సినిమాలను తెరకెక్కించిన దర్శకుడు క్రిష్ దర్శకత్వంలో ఓ సినిమా చేస్తున్నాడు. ఈ సినిమాకు ఇప్పటికే ‘కంచె’ అన్న టైటిల్‌ను ఖరారు చేసిన విషయం తెలిసిందే! ఫిబ్రవరి 27వ తేదీన లాంఛనంగా ప్రారంభమైన ఈ సినిమా మొదటి షెడ్యూల్ హైద్రాబాద్‌లో జరిగింది. ఈ షూటింగ్ క్రమంలోనే సినిమా కోసం నిర్మించిన ఓ భారీ సెట్‌లో చిత్రీకరణ జరిగింది. ఆ సన్నివేశాలు ఎంతో అద్భుతంగా వచ్చాయని యూనిట్ వర్గాలు తెలుపుతున్నాయి.

ప్రస్తుతం ఈ మూవీ రెండో షెడ్యూల్ జరుగుతోంది. తాటిపాక పరిసర ప్రాంతాల్లో కొంత షూటింగ్ జరుపుకుతున్న ఈ మూవీ ఇప్పుడు తాజాగా పదిహేను రోజుల పాటు నర్సాపురంలో షూటింగ్ జరగపుకోనుంది. ఇప్పటికే ఈ షెడ్యూల్ మొదలైంది కూడా! త్వరగా ఈ మూవీ షూటింగ్ ని ముగించుకుని, ప్రేక్షకుల ముందుకు తీసుకొచ్చేందుకు దర్శకనిర్మాతలు సన్నాహాలు చేస్తున్నారు. ఇక ఈ సినిమాలో వరుణ్ తేజ్ సరసన ప్రగ్య జైశ్వాల్ హీరోయిన్ గా నటిస్తోంది. రాజీవ్ రెడ్డి నిర్మిస్తున్న ఈ సినిమాను దసరాకు విడుదల చేసేలా ప్లాన్ చేస్తున్నారు.

‘ముకుందా’తో హీరోగా మంచి మార్కులు కొట్టేసిన వరుణ్.. తన తదుపరి సినిమాతో ప్రేక్షకులకు ‘కంచె’ వేస్తాడో లేదో తెలుసుకోవాలంటే మరికొన్నాళ్లపాటు ఆగాల్సిందే!