జూనియర్ ఎన్టీఆర్

Posted: 03/17/2015 04:33 PM IST

ఇటీవలే ‘టెంపర్’ సినిమాతో మంచి విజయం సాధించడంతోపాటు సమాజానికి ఓ మంచి మెసేజ్ అందించాడు జూనియర్ ఎన్టీఆర్. దీంతో చాలాకాలం నుంచి తాను నిరీక్షిస్తున్న విజయం ఎట్టకేలకే ఈ సినిమాతో తీరిపోయింది. ఈ నేపథ్యంలోనే తాను తీయబోయే చిత్రాలన్నీ ప్రయోగాత్మకంగానూ, సరికొత్తగానూ, ప్రేక్షకులకు కనువిందుగానూ వుండేవిధంగా ఈ యంగ్ టైగర్ చాలా జాగ్రత్తలు తీసుకుంటున్నాడు.

తన దగ్గరకు వస్తున్న వరుస ఆఫర్లను ఒప్పుకోకుండా, తన సక్సెస్ కు తోడయ్యే కథలను మాత్రమే ఎంచుకుంటున్నాడు. ఈ నేపథ్యంలో సుకుమార్ వంటి డైరెక్టర్ తో కలిసి సరికొత్త కథనంతో ప్రేక్షకుల ముందుకు రావాలని నిర్ణయం తీసుకున్నాడు ఎన్టీఆర్! నిజానికి ఈ చిత్రం షూటింగ్ ఇప్పటికే ప్రారంభం కావాల్సి వుంది కానీ.. కొన్ని కారణాల వల్ల కాస్త వాయిదా పడింది. త్వరలోనే ఈ మూవీ షూటింగ్ ప్రారంభం కానుందని ఆ మూవీ యూనిట్ వెల్లడించింది.

ఈ మూవీ ఇంకా సెట్స్ పైకి వెళ్లకుండానే ఎన్టీఆర్ మరో సినిమాకు గ్రీన్ సిగ్నల్ ఇచ్చినట్లు అప్పట్లో వార్తలు కూడా వచ్చాయి. ‘టెంపర్’ లాంటి బ్లాక్ బస్టర్ సినిమాకి కథను అందించిన వక్కంతం వంశీ దర్శకత్వంలో ఎన్టీఆర్ మూవీ చేసేందుకు ఓకే అన్నాడని ప్రచారం జరుగుతోంది. వంశీ చెప్పిన కథ కాస్త వెరైటీగా వుండటంతో అతనితో మూవీ చేసేందుకు యంగ్ టైగర్ పచ్చజెండా ఊపినట్లు వార్తలొస్తున్నాయి. అయితే.. దీనిపై అధికారిక ప్రకటన మాత్రం వెలువడలేదు.

ఇదిలావుండగా.. ఎన్టీఆర్, వినాయక్ కాంబినేషన్ మళ్లీ ప్రేక్షకుల ముందుకు రానుందని ఇండస్ట్రీలో వార్తలు వినిపిస్తున్నాయి. గతంలో వీరి కాంబోలో వచ్చిన సినిమాలు మంచి విజయాలు సాధించాయి. ఈ క్రమంలోనే వినాయక్ దర్శకత్వంలో మరో సినిమా చేయడానికి యంగ్ టైగర్ ఆసక్తి చూపుతున్నాడని సన్నిహిత వర్గాలంటున్నాయి. ఇందుకు సంబంధించి చర్చలు కూడా జరుగుతున్నట్లు చెబుతున్నారు.

ఎన్టీఆర్ అటు సుకుమార్, వంశీతో కమిట్ కాగా, వినాయక్ అఖిల్ తో ప్రాజెక్ట్ చేస్తున్నాడు. వారివారి సినిమాలు పూర్తయిన తర్వాత ఇద్దరు కలవనున్నారని అంటున్నారు. మరి.. ఈ వార్తల్లో ఎంత నిజముందో తెలియాలంటే మరికొన్నాళ్లు వేచి చూడాల్సిందే!