త్రివిక్రమ్ శ్రీనివాస్

Posted: 03/13/2015 07:14 PM IST

Trivikram srinivas megastar chiranjeevi 150 movie gossips

తెలుగు చిత్రపరిశ్రమలో మాటల మాంత్రికుడిగా పేరుగాంచిన ప్రముఖ దర్శకుడు త్రివిక్రమ్ శ్రీనివాస్! రైటర్ గా ఇండస్ట్రీలో అడుగుపెట్టి తన కలంతో ప్రేక్షకులను అలరించిన ఈయన.. అనంతరం అనతికాలంలోనే దర్శకునిగా అవతారమెత్తారు. యువతనే కాకుండా ఫ్యామిలీ ఆడియెన్స్ ని ఆకట్టుకునే తరహాలో మంచి సినిమాలను తెరకెక్కించి తిరుగులేని డైరెక్టర్ గా తనకంటూ ప్రత్యేక ముద్ర వేయించుకున్నారు. ప్రస్తుతం ఈయన దర్శకత్వంలో అల్లు అర్జున్ హీరోగా ‘సన్నాఫ్ సత్యమూర్తి’ సినిమా రూపొందుతున్న విషయం తెలిసిందే!

ఇదిలావుండగా.. ప్రస్తుతం టాలీవుడ్ లో త్రివిక్రమ్ తదుపరి చిత్రానికి సంబంధించి ఓ ప్రచారం కొనసాగుతోంది. మెగాస్టార్ చిరంజీవి 150వ చిత్రానికి ఈయనే దర్శకుడిగా ఫిక్స్ అయినట్లుగా వార్తలొస్తున్నాయి. ఇటీవలే చిరు ఓ కథను ఎంపిక చేసుకుని దానిపై వర్క్ కొనసాగిస్తున్నారు. ఈ మూవీని పూరీ జగన్నాథ్ లేదా వివి వినాయక్ ఇద్దరిలో ఎవరో ఒకరికి దర్శకత్వం వహించే అవకాశం వస్తుందని మొన్నిటివరకు వార్తలు చక్కర్లు కొట్టాయి. అయితే.. తాజాగా త్రివిక్రమ్ పేరు తెరపైకి వచ్చింది. ప్రస్తుతం ఆయన చేస్తున్న ‘సన్నాఫ్...’ మూవీ షూటింగ్ పూర్తికాగానే చిరంజీవి చిత్రంపై వర్క్ చేస్తారని అంటున్నారు.

ఫ్యామిలీ, యువతను ఆకట్టుకునేలా చిత్రాన్ని తీయడంలో శ్రీనివాస్ దిట్ట కాబట్టి.. ఈయనే చిరు 150 చిత్రానికి సరైన దర్శకుడని మెగా క్యాంపు భావించిందట! ఈ నేపథ్యంలోనే ఆయనతో చర్చలు జరిపేందుకు మెగాకుటుంబం సన్నద్ధమవుతోందని తెలుస్తోంది. అయితే.. ఈ వార్తల్లో ఎంతవరకు నిజముందో తెలియాలంటే కొన్నాళ్లు ఆగాల్సిందే!