మహేష్ బాబు

Posted: 09/16/2014 04:30 PM IST

టాలీవుడ్ లో ప్రిన్స్ మహేష్ బాబు ఫ్యాన్ ఫాలోయింగ్ ఏవిధంగా వుందో ప్రత్యేకంగా చెప్పుకోవాల్సిన అవసరం లేదు. ఈయకున్న ఈ ఫాలోయింగ్ ని దృష్టి పెట్టుకునే నిర్మాతలు ఎంతటి భారీ బడ్జెట్ తో నైనా ఇతనితో సినిమాలు తీయడానికి ముందుకు వస్తుంటారు. ఒకవేళ ఇతని సినిమా ఫ్లాపయినా... సదరు సినిమాకు చేసిన ఖర్చు రిలీజైన రెండు, మూడురోజుల్లోనే వసూలవుతాయి. అంతగా ప్రేక్షకుల ఆదరణను సంపాదించుకున్నాడు ఈ రాజకుమారుడు! అలాగే ఇతని ఇమేజ్ ను క్యాచ్ చేసుకోవడానికి కొన్ని ప్రైవేట్ సంస్థలు మహేష్ కి కొన్ని కోట్లు సమర్పించుకుని తమ బ్రాండ్ అంబాసిడర్ గా నియమించుకుంటున్నారు. అంటే.. ఒకవైపు సినిమాలతోపాటు మరోవైపు అడ్వర్టయిజ్ మెంట్లలో దూసుకుపోతున్నాడు.

ఇదిలావుండగా.. మన రెండు తెలుగు రాష్ట్రాల్లో రానురాను మల్టీప్లక్సుల సంఖ్య పెరిగిపోతున్నట్టు కనిపిస్తున్నాయి. తాజాగా హైదరాబాద్ లో ఎంక్యూబ్ ఏషియన్ సినిమాస్ మల్టీ ప్లెక్స్ ఒకటి సిద్ధమవుతోంది. అత్తాపూర్ లో వున్న ఈ మల్టీప్లెక్స్.. మొదటినుంచే ప్రేక్షకులకు సరికొత్త అనుభూతిని ఇవ్వడానికి అన్ని ఏర్పాట్లను సిద్ధం చేసుకుంది. తన మార్కెటింగ్ స్థాయిని ఒక్కసారిగా పబ్లిసిటీ చేసుకునే ఆలోచనతో వున్న ఆ మల్టీ ప్లెక్స్ నిర్వాహకులు... ప్రిన్స్ చేతుల మీదుగా ప్రారంభించాలని నిర్ణయం తీసుకున్నారు. ఎలాగో మహేష్ ‘‘ఆగడు’’ చిత్రం 19వ తేదీన రిలీజ్ కాబోతోంద కనుక... అతని చేతుల మీదే గ్రాండ్ గా ఓపెనింగ్ చేయించి.. ఆ సినిమాను తమ థియేటర్ లో ప్రదర్శించాలని నిర్ణయానికి వచ్చినట్లు తెలుస్తోంది. దీంతో మల్టీప్లెక్స్ పబ్లిసిటీ భారీగానే జరుగుతుంది... సినిమా వసూళ్లు బాగానే వస్తాయి. మరోవైపు మహేష్ సినిమాకు లభించాల్సిన ప్రచారం కూడా లభిస్తుంది.. అతనికి రావాల్సిన పారితోషికం కూడా వచ్చేస్తుంది.

శ్రీనువైట్ల దర్శకత్వం వహించిన ఈ సినిమాను 14 రీల్స్ ఎంటర్ టైన్ మెంట్ సంస్థవారు భారీగా ఖర్చుపెట్టి నిర్మించిన విషయం తెలిసిందే! అలాగే ప్రమోషన్ లో భాగంగా ఎక్కడా కంప్రమైజ్ కాకుండా కోట్లకు కోట్లు ఖర్చు పెట్టేస్తోంది. పోస్ట్ ప్రొడక్షన్స్ తోపాటు సెన్సార్ కార్యక్రమాన్ని కూడా ముగించుకున్న ఈ సినిమాకు ‘‘యూ/ఏ’’ సర్టిఫికెట్ దక్కింది. ఈ మూవీపై నిర్మాతలతోపాటు మహేష్ బాబు కూడా చాలా ఆశలు పెట్టుకున్నాడు. మరి ఈ సినిమా ఏ స్థాయిలో విజయాన్ని దక్కించుకుంటుందో సెప్టెంబర్ 19వరకు ఆగాల్సిందే!