వుహాన్ ఓపెన్ తో ఏడో టైటిల్ ను ఖాతాలో వేసుకున్న సానియా-హింగిస్ జోడి

Posted: 10/03/2015 03:47 PM IST

Sania mirza martina hingis win wuhan open title

అధ్భుతం. ఇంకా చెప్పాలంటే మహాద్భుతం.. ఈ ఏడాది మంచి జోరును కనబరుస్తూ.. సరిలేరు తమకెవ్వరూ అంటూ టెన్నీస్ ప్రపంచంలో ముందుకు దూసుకుపోతూ.. భారత, స్విస్ జోడి అందరి అంచానాలను మించి విజయాలను అందుకుంటోంది. తాజాగా చైనాలో జరిగిన వుహాన్ ఓపెన్‌ టైటిల్ను కూడా ఈ జోడీ కైవసం చేసుకుంది. శనివారం జరిగిన మహిళల డబుల్స్ ఫైనల్లో భారత టెన్నిస్ డబుల్స్ స్టార్, తెలంగాణ బ్రాండ్ అంబాసిడర్, ప్రపంచ డబ్సుల్ నెంబర్ వన్ రాంకర్ సానియా మీర్జా.. తన స్విస్ పార్టనర్ మార్టినా హింగిస్ తో కలసి ఈ విజయాన్ని సాధించింది. ఈ జోడీ రుమేనియాకు చెందిన ఇరీనా కామెలియా బెగూ - మోనికా నికెలెస్కూ జోడీపై 6-2, 6-3 తేడాతో విజయం సాధించింది.

ఈ ఏడాది పదో టోర్నమెంట్‌లో టైటిల్ పోరుకు అర్హత సాధించిన తన భాగస్వామి మార్టినా హింగిస్ (స్విట్జర్లాండ్)తో కలిసి సానియా వుహాన్ ఓపెన్‌లో ఫైనల్లోకి దూసుకెళ్లింది. ఏడో విజయాన్ని సొంతం చేసుకుంది. శుక్రవారం జరిగిన మహిళల డబుల్స్ సెమీఫైనల్లో టాప్ సీడ్ సానియా-హింగిస్ ద్వయం 6-2, 6-1తో నాలుగో సీడ్ హావో చింగ్ చాన్-యుంగ్ జాన్‌చాన్ (చైనీస్ తైపీ) జోడీపై విజయం సాధించింది. 53 నిమిషాల్లోనే ముగిసిన ఈ మ్యాచ్‌లో ఈ ఇండో-స్విస్ జంట తమ సర్వీస్‌ను మూడుసార్లు కాపాడుకొని ప్రత్యర్థి జోడీ సర్వీస్‌ను ఐదుసార్లు బ్రేక్ చేసింది.

జి. మనోహర్