Posted: 03/11/2013 08:33 PM IST

క్రికెట్‌లో సచిన్ విఖ్యాత బ్యాట్స్‌మెన్ అని దక్షిణాఫ్రికా బౌలింగ్ దిగ్గజం అలెన్ డొనాల్డ్ కితాబిచ్చారు. ఫుట్‌బాల్ దిగ్గజాలు పీలే, మారడోనాలను కలిపితే వచ్చే స్థాయి క్రికెట్‌లో సచిన్ టెండూల్కర్‌కు ఉందని ఈ సఫారీ మాజీ పేసర్ ఆకాశానికెత్తారు. ‘సచిన్ -క్రికెటర్ ఆఫ్ ది సెంచరీ’ అనే పుస్తకంలో ఆయన ఈ వ్యాఖ్యలు చేశారు.

‘సచిన్ లేని క్రికెట్‌ను ఊహించలేం. అతను రిటైరైతే ఆట కళ తప్పుతుంది. నా దృష్టిలో అతనో విశిష్ట క్రికెటర్. అంచనాలకందని బ్యాట్స్‌మన్. క్రికెట్లో గ్రేటెస్ట్ ఆటగాడెవరంటే... ఠక్కున వచ్చే సమాధానం సచిన్. ఇందులో రెండో పేరుకు ఆస్కారమే లేదు’ అని 46 ఏళ్ల సఫారీ దిగ్గజం పేర్కొన్నారు. భారత మాస్టర్ బ్యాట్స్‌మన్ తనకు 1995 నుంచి తెలుసన్నారు. అప్పట్లో అతను కౌంటీల్లో యార్క్‌షైర్‌కు ఆడుతుండగా తన తాత పరిచయం చేశాడని చెప్పారు.

‘అప్పుడే నా మదిలో అతనో నంబర్‌వన్ ఆటగాడని అనిపించింది. ఇప్పటి వరకు ఆ అభిప్రాయంలో ఎలాంటి మార్పు లేదు’ అని డొనాల్డ్ ఆ పుస్తకంలో పేర్కొన్నారు. మాస్టర్‌ను ఎదుర్కోవాలంటే అనుభవం, టెక్నిక్ ఉంటే సరిపోదని... చక్కని వైవిధ్యమున్న బంతులేస్తేనే ఫలితం రాబట్టగలమని చెప్పారు.