Posted: 11/07/2012 02:54 PM IST

లాహోర్ లో జరుగుతోన్న ఆసియా కబడ్డీ చాంపియన్‌షిప్ వివాదాస్పదంగా ముగిసింది. టైటిల్‌ను పాకిస్తాన్ జట్టు ఏక రీతిలో కైవసం చేసుకుంది. తమ కోచ్‌కు జరిమానా విధించడాన్ని నిరసిస్తూ భారత జట్టు ఫైనల్ మ్యాచ్ నుంచి అర్ధాంతరంగా వాకౌట్ చేయడంతో ఈ టైటిల్ పాకిస్తాన్ వశమైంది. పాకిస్తాన్‌లోని పంజాబ్ స్టేడియంలో జరిగిన ఈ మ్యాచ్‌లో అంపైర్ తీసుకున్న వివాదాస్పద నిర్ణయాలపై నిరసన వ్యక్తం చేసేందుకు భారత కోచ్ గూర్మెల్ సింగ్ రెండుసార్లు గ్రౌండ్‌లోకి ప్రవేశించాల్సి వచ్చింది. అయినప్పటికీ తీరు మార్చుకోని అంపైర్ మరోసారి వివాదాస్పద నిర్ణయం తీసుకున్నాడు. దీనిపై నిరసన తెలిపేందుకు గూర్మెల్ సింగ్ మరోసారి గ్రౌండ్‌లో ప్రవేశించగా, పదేపదే మ్యాచ్‌కు అంతరాయం కలిగిస్తున్నాడంటూ పాక్ ఆటగాళ్లు అభ్యంతరం తెలిపారు. దీంతో ఉభయ జట్ల ఆటగాళ్ల మధ్య కొద్దిసేపు తీవ్ర స్థాయిలో వాగ్యుద్ధం జరిగింది. ఆ తర్వాత పోరును కొనసాగించరాదని నిశ్చయించుకున్న భారత జట్టు మ్యాచ్ నుంచి వాకౌట్ చేసింది. అప్పటికి పాకిస్తాన్ జట్టు 40-31 పాయింట్ల తేడాతో ఆధిక్యతలో నిలువడంతో ఆ జట్టుకు టైటిల్‌ను అందజేశారు.

...avnk