ఏంటీ? అమ్మ మనసులో అతను ఉన్నాడా!

Posted: 10/06/2016 03:33 PM IST

20 రోజులకు పైగా ఆస్పత్రిలో చికిత్స పొందుతున్న అమ్మ కోసం వీరాభిమానులు కళ్లు కాయలు కాచేలా ఎదురు చూస్తున్నారు. ఆమె కోలుకుంటుందని చెబుతున్నప్పటికీ క్షణానికో ఉత్కంఠ కలిగించే పరిణామాలు చోటుచేసుకుంటుండటంతో అసలు అపోలోలో ఏం జరుగుతుందో ఎవరికీ అంతుచిక్కని పరిస్థితి. ఇదిలా ఉంటే... మరోవైపు కీలకమైన పాలనా వ్యవహారాలపై రకరకాల కోణాల్లో చర్చలు జరుగుతున్నాయి. అమ్మ తర్వాతి వారుసులు ఎవరంటూ అంతర్గతంగా చర్చలు... ఇంతలో ఓ వేటు ఓ స్టార్ వైపు చూపించారు.

అది ఎవరో కాదు. స్టార్ హీరో అజిత్ కుమార్ అంటూ. సూపర్ స్టార్ రజనీకాంత్ రాజకీయాల వైపు మొగ్గు లేకపోవటం, మరోస్టార్ హీరో విజయ్ అన్నాడీఎంకేలకు అంత మంచి సంబంధాలు లేకపోవటంతో ఇప్పుడు దృష్టంతా అజిత్ వైపు మళ్లింది. వివాదరహితుడిగా పేరున్న అజిత్ కు తమిళనాట భీభత్సమైన ఫాలోయింగ్ ఉంది. సేవాగుణంలో టాలీవుడ్ లో పవర్ స్టార్ పవన్ కళ్యాణ్ ఎలాగో, అక్కడ తలా అజిత్ కూడా అలాగే అంటూ పోలుస్తుంటారు. అందుకే అన్నాడీఎంకే పగ్గాలను అజిత్ కు అప్పగించే అవకాశం ఉన్నాయంటూ ఓ ఆంగ్ల పత్రిక కథనాలు ప్రచురించింది.

అంతేకాదు జయలలిత అందుకు సంబంధించిన వీలునామాను సన్నిహితులకు అప్పజెప్పిందని, తమిళనాడుకు కాబోయే ముఖ్యమంత్రి అజితేనంటూ సదరు పత్రిక నిర్ధారణ చేసేసుకుంది. గతంలో అవినీతి ఆరోపణలపై ఆమె జైలుకి వెళ్లినప్పడు పన్నీర్ సెల్వం సీఎంగా భరతుడి టైప్ లో పాలన నిర్వహించాడు. కానీ, ఇప్పుడున్న పరిస్థితుల్లో ఎంత అనుచరుడు అయినప్పటికీ, పన్నీర్ కు మళ్లీ పగ్గాలు అప్పజెప్పే అవకాశాలు మాత్రం లేవనే అంటున్నారు. ఇంకోవైపు శశికళ పేరు ప్రస్తావనకు వచ్చినప్పటికీ, ఆమెకు రాజకీయ అనుభవం లేన్నందున పక్కకు పెట్టేశారంట. దీంతో జయకు సన్నిహితుడైన అజిత్ కే ఎక్కువ ఛాన్సులు ఉన్నాయంటూ అందులో పేర్కొంది.

అయితే పాలనాపరంగా అనుభం లేని అజిత్ ను ఒక్కసారిగా సీఎంను చేస్తే ఇబ్బందులు తలెత్తే (విమర్శలు కూడా) అవకాశం ఉన్నందున, ముందు పన్నీర్ సెల్వంను తాత్కాలిక ముఖ్యమంత్రిగా చేసి, ఆపై అజిత్ ను నెమ్మదిగా సీఎంగా ప్రకటించాలన్న భావనలో అన్నాడీఎంకే ఉన్నట్లు సమాచారం. ఈ వార్తల్లో ఎంత వరకు నిజముందో తెలీదు గానీ, అత్యంత కీలకమైన నేతల ద్వారానే ఈ లీకులు బయటికి వచ్చినట్లు సదరు కథనం చివర్లో ఆ పత్రిక పేర్కొంది. ప్రస్తుతానికైతే జయకు, ప్రభుత్వానికి సలహాదారుగా ఉన్న షీలా బాలకృష్ణన్, కొందరు అధికారుల సాయంతో కీలక నిర్ణయాలను తీసుకుంటూ పాలనను నడిపిస్తోంది.